عمران خان کا ایک اور خط لکھنے کا اعلان، آزادی کی جنگ جاری رکھنے کا عزم

راولپنڈی (لیہ ٹی وی) پاکستان تحریک انصاف (پی ٹی آئی) کے بانی عمران خان کی بہن علیمہ خان نے انکشاف کیا ہے کہ عمران خان اگلے ہفتے ایک اور خط لکھنے جا رہے ہیں۔ اڈیالہ جیل کے باہر میڈیا سے گفتگو کرتے ہوئے علیمہ خان نے بتایا کہ بانی پی ٹی آئی نے کہا ہے کہ آزادی کی جنگ ابھی ختم نہیں ہوئی اور وہ اپنے کیسز کا سامنا انہی ججز کے سامنے کریں گے۔ انہوں نے مزید کہا کہ عمران خان نے اس بات پر زور دیا کہ وہ کسی بھی قسم کی ڈیل نہیں کریں گے اور ملک میں رول آف لاء کی بالادستی کے لیے چیف جسٹس پاکستان کو فیصلہ کرنا ہوگا۔ علیمہ خان کے مطابق بانی پی ٹی آئی نے پنجاب حکومت پر الزام عائد کیا کہ انہوں نے پی ٹی آئی کے کارکنان کے خلاف کریک ڈاؤن کیا ہے، جبکہ دہشتگردی کے خلاف قوم اور فوج کو ایک ساتھ کھڑا ہونا ہوگا۔ واضح رہے کہ اس سے قبل بھی عمران خان آرمی چیف کو دو کھلے خطوط لکھ چکے ہیں، جن کے بارے میں سیکیورٹی ذرائع کا کہنا تھا کہ آرمی چیف کو کوئی خط موصول نہیں ہوا۔