کمشنر ڈی جی خان اشفاق احمد چوہدری کا ڈی ایچ کیو ہسپتال لیہ کا اچانک دورہ، ایمرجنسی، ڈائیلاسز یونٹ اور صحت کارڈ سینٹر کا معائنہ، مریضوں سے سہولیات بارے دریافت—صفائی، پارکنگ شیڈ اور ریویمپنگ جلد مکمل کرنے کی ہدایت

لیہ(نمائندہ لیہ ٹی وی) کمشنر ڈیرہ غازی خان ڈویژن اشفاق احمد چوہدری نے لیہ کا ایک روزہ دورہ کیا۔ کمشنر ڈی جی خان اچانک ڈی ایچ کیو ہسپتال پہنچ گئے۔ ڈپٹی کمشنر آصف علی ڈوگر ان کے ہمراہ تھے۔ ایڈیشنل کمشنرز شاہد ملک، شبیر احمد ڈوگر، اسسٹنٹ کمشنر حارث حمید خان، سی ای او ہیلتھ ڈاکٹر شاہد ریاض اور ایم ایس ڈاکٹر غلام محی الدین اس موقع پر موجود تھے۔ کمشنر ڈی جی خان اشفاق احمد چوہدری نے ایمرجنسی وارڈ، صحت کارڈ سینٹر اور ڈائیلاسز یونٹ کا معائنہ کیا۔ انہوں نے وہیل چیئر پر آئے مریض سے خیریت دریافت کی اور سہولیات بارے استفسار کیا۔ کمشنر اشفاق احمد چوہدری نے شہری سے پوچھا کہ آپ کو ہسپتال سے مفت دوائیں ملی ہیں، جس پر شہری نے کہا کہ جی مجھے ادویات ملی ہیں۔ کمشنر نے ایم ایس ڈی ایچ کیو کو ہدایت کی کہ ہسپتال کے ریویمپنگ کا کام جلد مکمل کیا جائے اور پارکنگ شیڈ سمیت دیگر تعمیر و مرمت، تزئین و آرائش اور صفائی کے معیار کو مزید بہتر کیا جائے۔ کمشنر ڈی جی خان نے اس موقع پر میڈیا سے گفتگو کرتے ہوئے کہا کہ ہسپتال کی مجموعی صورت حال تسلی بخش ہے۔ ہسپتال میں تمام ضروری ادویات دستیاب ہیں اور مریضوں نے بھی اطمینان کا اظہار کیا ہے۔ کمشنر اشفاق احمد چوہدری نے کہا کہ وزیر اعلیٰ پنجاب مریم نواز شریف کے وژن صحت مند پنجاب کے تحت علاج معالجے کی بہترین سہولیات اور مفت ادویات کی فراہمی کے لئے ڈویژن بھر میں ہر ممکن اقدامات اٹھائے جا رہے ہیں۔ دریں اثناء کمشنر ڈی جی خان نے ماڈل ریڑھی بازار لیہ کا بھی دورہ کیا اور پھلوں، سبزیوں کی کوالٹی اور قیمتوں کا جائزہ لیا۔ بعد ازاں کمشنر ڈی جی خان نے اراضی ریکارڈ سنٹر لیہ کا بھی دورہ اور مختلف کاؤنٹرز پر سروسز کی فراہمی کا جائزہ لیا۔ کمشنر ڈی جی خان نے اراضی ریکارڈ سنٹر سے رجوع کرنے والی خاتون سے مسئلہ دریافت کیا اور سروس بارے استفسار کیا۔