اسلام آباد (لیہ ٹی وی) بھارتی ساختہ موبائل فونز اور دیگر الیکٹرانک مصنوعات پاکستان کی سائبر سیکیورٹی کے لیے سنگین خطرہ بن گئی ہیں۔ حکومتی ذرائع کے مطابق بھارتی آئی فونز اور متعلقہ آلات کو پاکستانی صارفین کے لیے سنجیدہ نوعیت کے سیکیورٹی رسک قرار دیا گیا ہے۔
ایک مراسلے میں انکشاف کیا گیا ہے کہ بھارتی مصنوعات کے ذریعے پاکستان کے حساس انفارمیشن انفراسٹریکچر میں مداخلت اور مانیٹرنگ کے امکانات بڑھ گئے ہیں۔ مراسلے میں خبردار کیا گیا ہے کہ بھارتی مینوفیکچرنگ کی پروڈکٹس میں میلویئر اور سپائی وئیر جیسے خطرناک وائرس موجود ہو سکتے ہیں، جن کے ذریعے حساس ڈیٹا چرایا جا سکتا ہے۔
ذرائع نے بتایا کہ بھارتی مصنوعات کے ہارڈ ویئر اور سافٹ ویئر میں چھیڑچھاڑ کرکے پاکستانی صارفین کی نگرانی اور ان کا ڈیٹا اکٹھا کرنے کی کوشش کی جا سکتی ہے۔ فیک ویب سائٹس اور فشنگ ای میلز کے ذریعے اہم معلومات حاصل کرنے کا خطرہ بھی موجود ہے۔
مراسلے میں عوام کو ایپل کی مصنوعات صرف تصدیق شدہ ری سیلرز سے خریدنے، ڈیوائسز کی سیل چیک کرنے، اور آئی فون آپریٹنگ سسٹم کو اپڈیٹ رکھنے کی سفارش کی گئی ہے۔ ساتھ ہی اینڈ ٹو اینڈ انکرپٹڈ کمیونکیشن، مضبوط پاسورڈز، اور اینٹی وائرس ایپلی کیشنز کے استعمال پر زور دیا گیا ہے۔
حکام نے شہریوں کو متنبہ کیا ہے کہ بھارتی مصنوعات کے ذریعے سائبر حملوں سے بچنے کے لیے احتیاطی تدابیر اختیار کی جائیں اور حساس ڈیٹا کے تحفظ کو یقینی بنایا جائے۔
