لیہ: ضلع لیہ میں خصوصی انسدادِ پولیو مہم کا باقاعدہ افتتاح کر دیا گیا۔ ایڈیشنل ڈپٹی کمشنر سوشل سروسز خضر ظہور نے ڈی ایچ کیو ہسپتال کے چلڈرن وارڈ میں بچوں کو پولیو سے بچاؤ کے قطرے پلا کر مہم کا افتتاح کیا۔
اس موقع پر سی ای او صحت ڈاکٹر شاہد ریاض، ڈی ایچ او ڈاکٹر غلام محی الدین، چائلڈ اسپیشلسٹ ڈاکٹر ام سلمہ اور ڈاکٹر آصف میرانی بھی موجود تھے۔اس موقع پر اے ڈی سی سوشل سروسز خضر ظہور نے بتایا کہ ضلع بھر میں پانچ سال تک کی عمر کے 4 لاکھ 35 ہزار 690 بچوں کو پولیو سے بچاؤ کے قطرے پلانے کا ہدف مقرر کیا گیا ہے، جس کے لیے مجموعی طور پر 1797 ٹیمیں تشکیل دی گئی ہیں۔ان ٹیموں میں 1661 موبائل، 78 فکسڈ اور 58 ٹرانزٹ ٹیمیں شامل ہیں، جبکہ 348 ایریا انچارجز پولیو ٹیموں کی نگرانی کے فرائض انجام دیں گے۔
ٹیمیں گھر گھر جا کر پانچ سال تک کی عمر کے بچوں کو پولیو سے بچاؤ کے قطرے پلائیں گی۔خضر ظہور نے کہا کہ بچوں کو عمر بھر کی معذوری سے بچانا ہم سب کی مشترکہ ذمہ داری ہے۔ والدین اپنے بچوں کو پولیو سے بچاؤ کے قطرے ضرور پلوائیں اور محکمہ صحت کی ٹیموں سے بھرپور تعاون کریں۔سی ای او صحت ڈاکٹر شاہد ریاض نے بتایا کہ خصوصی انسدادِ پولیو مہم 2 سے 5 نومبر 2026ء تک جاری رہے گی۔
مہم کے سو فیصد اہداف کے حصول کے لیے تمام دستیاب وسائل بروئے کار لائے جا رہے ہیں۔
