کراچی (لیہ ٹی وی) سندھ میں بلدیاتی انتخابات کے لیے مخصوص نشستوں پر امیدواروں کی کمی دیکھنے کو ملی، جس کے نتیجے میں کئی نشستیں خالی رہ گئیں۔ کراچی سے خواجہ سراؤں کے لیے مخصوص 152 نشستوں میں سے صرف ایک فارم جمع ہوا، جبکہ باقی 151 نشستیں خالی رہ گئیں۔
الیکشن کمیشن کے ذرائع کے مطابق، یہ نشستیں ضلع کونسل، میونسپل کارپوریشن، میونسپل کمیٹی، ٹاؤن کمیٹی اور ٹاؤن میونسپل کارپوریشن کے لیے مخصوص تھیں۔ فارم جمع کروانے کی آخری تاریخ 24 جنوری تھی، اور اس میں کئی نشستوں پر کوئی امیدوار سامنے نہیں آیا۔
مخصوص نشستوں میں خواتین کی 9 نشستوں میں سے 5 خالی رہ گئیں، جبکہ صرف 4 پر فارم جمع ہوئے۔ یونین کونسلز اور یونین کمیٹیوں میں 425 مخصوص نشستوں کے لیے انتخابات ہونے تھے، جن میں سے یونین کمیٹی کی 125 زائد نشستوں پر کوئی امیدوار سامنے نہیں آیا۔
نوجوانوں کی 2 نشستوں پر فارم جمع نہیں ہوئے، جبکہ 3 نشستوں پر فارم آئے۔ لیبر کی 2 نشستوں پر فارم جمع ہوئے، تاہم 2 نشستیں خالی رہ گئیں۔ اقلیتی نشستوں میں سے 3 پر فارم جمع ہوئے اور 2 خالی رہ گئیں۔ خصوصی افراد کے لیے مختص 10 نشستوں میں سے 4 پر فارم جمع ہوئے، جبکہ 6 نشستیں خالی رہ گئیں۔
