لیہ: ریسکیو 1122 ضلع لیہ نے ماہِ اکتوبر 2026 کے دوران مجموعی طور پر 5 ہزار 465 ایمرجنسیز پر بروقت رسپانس دیتے ہوئے 5 ہزار 349 متاثرین کو ریسکیو اور طبی سہولیات فراہم کیں، جبکہ 2 ہزار 425 مریضوں کو ہسپتال منتقل کیا گیا۔ ڈسٹرکٹ ایمرجنسی آفیسر ڈاکٹر سجاد احمد ملک کی زیر نگرانی ریسکیو ٹیموں نے یکم اکتوبر سے 31 اکتوبر تک ضلع بھر میں مختلف نوعیت کی ایمرجنسیز پر کارروائیاں انجام دیں۔
ماہانہ رپورٹ کے مطابق ریسکیو ٹیموں کا اوسط رسپانس ٹائم 7 منٹ 2 سیکنڈ رہا۔ اس دوران 3 ہزار 231 میڈیکل ایمرجنسیز، 657 روڈ ٹریفک حادثات، 99 کرائم ایمرجنسیز، 144 گرنے کے واقعات، 20 آتشزدگی کے واقعات، ڈوبنے کا ایک واقعہ، عمارتیں منہدم ہونے کے 6 واقعات اور 427 دیگر ریسکیو آپریشنز پر کارروائیاں کی گئیں۔ اس کے علاوہ 723 پیشنٹ ٹرانسفر سروسز بھی فراہم کی گئیں۔
رپورٹ کے مطابق 2 ہزار 122 افراد کو موقع پر ابتدائی طبی امداد دی گئی، جبکہ 157 میتیں پنجاب ڈیڈ باڈی ٹرانسپورٹیشن سروس کے تحت سرکاری ہسپتالوں سے لواحقین کے گھروں تک بلا معاوضہ منتقل کی گئیں۔ مختلف ایمرجنسیز کے دوران 79 افراد جاں بحق ہوئے۔
اس موقع پر ڈسٹرکٹ ایمرجنسی آفیسر ڈاکٹر سجاد احمد ملک نے ریسکیو اہلکاروں کی پیشہ ورانہ صلاحیتوں اور بروقت رسپانس کو سراہتے ہوئے کہا کہ ریسکیو 1122 کا بنیادی مقصد شہریوں کی جان و مال کا تحفظ اور ہر ایمرجنسی میں فوری و مؤثر خدمات فراہم کرنا ہے۔ انہوں نے افسران اور اہلکاروں کو ہدایت کی کہ سروس کے معیار، رسپانس ٹائم اور پیشہ ورانہ کارکردگی میں مزید بہتری کے لیے کوششیں جاری رکھی جائیں۔
