خواتین کے ووٹ ڈالنے کے رجحانات: فافن کی رپورٹ میں اہم انکشافات

اسلام آباد (لیہ ٹی وی) فری اینڈ فیئر الیکشن نیٹ ورک (فافن) کی رپورٹ میں انکشاف کیا گیا ہے کہ عام انتخابات میں 18 فیصد کمیونیٹیز میں خواتین کا ووٹ مردوں سے مختلف رہا، جبکہ 82 فیصد نے مردوں کے ساتھ ایک ہی امیدوار کو ووٹ دیا۔
رپورٹ کے مطابق دیہی علاقوں کے مقابلے میں شہری علاقوں میں مرد و خواتین کے انتخاب میں زیادہ اختلاف نظر آیا۔ اسلام آباد میں سب سے زیادہ کمیونیٹیز میں مرد و خواتین کے پولنگ اسٹیشنز کے نتائج مختلف رہے، جبکہ بلوچستان دوسرے نمبر پر رہا۔ سندھ میں 19 فیصد، پنجاب میں 18 فیصد، اور خیبر پختونخوا میں 13 فیصد کمیونیٹیز میں ووٹرز کے رجحانات مختلف تھے۔
فافن نے انکشاف کیا کہ قومی اسمبلی کے 37 حلقوں میں خواتین پولنگ اسٹیشنز کے سب سے زیادہ ووٹ لینے والے امیدوار کامیاب نہیں ہو سکے۔ رپورٹ کے مطابق پی ٹی آئی کو ان کمیونیٹیز میں خواتین ووٹرز کی زیادہ حمایت ملی جہاں ان کے ووٹ مردوں کے انتخاب سے مختلف رہے۔
فافن کا جائزہ 21 ہزار 188 کمیونیٹیز اور 42 ہزار 804 قابل موازنہ پولنگ اسٹیشنز پر مشتمل تھا، جس میں 3 ہزار 884 کمیونیٹیز میں مرد و خواتین کے ووٹ ڈالنے کے رجحانات میں نمایاں فرق دیکھا گیا۔