لیہ(نمائندہ لیہ ٹی وی ) وزیر اعلیٰ پنجاب مریم نواز شریف کے ویژن اور حکومتی اقدامات، بالخصوص گرین پنجاب شجرکاری مہم پر مؤثر اور عملی درآمد کے سلسلے میں گورنمنٹ ہائیر سیکنڈری اسکول 139A/TDA لیہ کی کاوشوں کو باقاعدہ طور پر سراہا گیا۔اس موقع پر ڈپٹی کمشنر لیہ آصف علی ڈوگر نے اسکول میں جاری شجرکاری مہم اور ماحولیاتی بہتری کے اقدامات کا جائزہ لیا اور ان کاوشوں کو سراہتے ہوئے کہا کہ تعلیمی اداروں کا ماحولیاتی تحفظ اور شجرکاری میں کردار نہایت اہم ہے۔انہوں نے اسکول کے پرنسپل ماہر عبدالمجید کی محنت، قیادت اور حکومتی پالیسیوں پر حقیقی معنوں میں عملدرآمد کو قابلِ تحسین قرار دیتے ہوئے کہا کہ ایسے اقدامات نہ صرف طلبہ میں ماحول دوست شعور بیدار کرتے ہیں بلکہ علاقے کو سرسبز و شاداب بنانے میں بھی اہم کردار ادا کرتے ہیں۔ڈپٹی کمشنر نے اس عزم کا اظہار کیا کہ ضلعی انتظامیہ وزیر اعلیٰ پنجاب کے گرین پنجاب وژن کو عملی جامہ پہنانے کے لیے تمام تعلیمی اداروں کے ساتھ مل کر شجرکاری مہم کو مزید مؤثر بنائے گی تاکہ ماحول کو بہتر اور سرسبز بنایا جا سکے۔
