لیہ میں غیر قانونی ایل پی جی ری فلنگ کے خلاف کریک ڈاؤن، سول ڈیفنس کی کارروائی، تھانہ پیر جگی میں دو مقدمات درج، فائر سیفٹی انتظامات ناقص ہونے پر چالان

لیہ(نمائندہ لیہ ٹی وی )کنٹرولر سول ڈیفنس / ڈپٹی کمشنر لیہ آصف علی ڈوگر کی ہدایت پر ضلع لیہ میں غیر قانونی ایل پی جی ری فلنگ اور ڈیکینٹنگ کے خلاف کارروائیاں مسلسل جاری ہیں۔ اسی سلسلے میں سول ڈیفنس لیہ کی ٹیم کارروائی کرتے ہوئے تھانہ پیر جگی کی حدود میں غیر قانونی ایل پی جی ری فلنگ میں ملوث عناصر کے خلاف کریک ڈاؤن کیا۔کارروائی کے دوران غیر قانونی سرگرمیوں میں ملوث افراد کے خلاف تھانہ پیر جگی میں دو مقدمات درج کروائے گئے جبکہ فائر سیفٹی کے غیر تسلی بخش انتظامات پر دو چالان بھی کئے گئے۔ سول ڈیفنس کی ٹیم نے موقع پر موجود سلنڈرز، آلات اور حفاظتی انتظامات کا معائنہ کرتے ہوئے قانون کی خلاف ورزی پر فوری قانونی کارروائی عمل میں لائی سول ڈیفنس آفیسر توقیر عباس نے کہا کہ غیر قانونی ایل پی جی ری فلنگ نہ صرف قانون کی صریح خلاف ورزی ہے بلکہ انسانی جانوں کے لئے بھی شدید خطرہ ہے۔ انہوں نے کہا کہ عوام کے جان و مال کے تحفظ کو ہر صورت یقینی بنایا جائے گا اور ایسے عناصر کے خلاف بلا تفریق کارروائیاں جاری رہیں گی۔