غرباء، بیوگان اور یتیموں میں راشن اور جامِ شیریں تقسیم، خدمتِ خلق سے اللہ اور اس کے رسول ﷺ کی خوشنودی حاصل ہوتی ہے: خضر حیات خان

لیہ(نمائندہ لیہ ٹی وی ) پبلک ویلفیئر سوسائٹی رجسٹرڈ جمن شاہ کے زیر اہتمام غرباء، معذور افراد، بیوگان اور یتیموں میں راشن اور قرشی جامِ شیریں تقسیم کیا گیا۔ اس موقع پر ڈپٹی ڈائریکٹر سوشل ویلفیئر خضر حیات خان اور محمد شہریار مہمانانِ خصوصی تھے۔تقریب سے خطاب کرتے ہوئے خضر حیات خان نے کہا کہ خدمتِ خلق کے ذریعے اللہ تعالیٰ اور اس کے رسول ﷺ کی خوشنودی حاصل ہوتی ہے۔ انہوں نے کہا کہ وقت کا بہترین مصرف دکھی انسانیت کی خدمت ہے اور معاشرے میں مستحق افراد کی مدد کرنا ایک عظیم انسانی اور اسلامی فریضہ ہے۔ انہوں نے کہا کہ عید کی خوشیوں میں غرباء کو شامل کرنے سے دلی سکون ملتا ہے اور معاشرے میں محبت اور ہمدردی کو فروغ ملتا ہے۔صدر پبلک ویلفیئر سوسائٹی حکیم عبداللطیف چوہان نے کہا کہ پبلک ویلفیئر سوسائٹی اپنی مدد آپ کے تحت اور قرشی فاؤنڈیشن کے تعاون سے غریبوں کی فلاح و بہبود کے لیے مسلسل کام کر رہی ہے۔ انہوں نے کہا کہ دکھی انسانیت کی خدمت ہمارا مشن ہے اور محدود وسائل کے باوجود کئی سالوں سے علاقے کے نادار اور مستحق افراد کی خدمت کی جا رہی ہے۔ انہوں نے قرشی فاؤنڈیشن کا شکریہ ادا کرتے ہوئے کہا کہ انہوں نے دور دراز علاقے کے مستحق لوگوں کو یاد رکھا۔اس موقع پر حکیم محمد اشرف علی، حکیم محسن رضا، غلام رسول، حافظ عبدالرحمن اور دیگر عہدیداران بھی موجود تھے۔ تقریب کے اختتام پر مرحومین کی مغفرت کے لیے خصوصی دعا بھی کی گئی۔