کوٹ سلطان میں دکان کی چھت توڑ کر لاکھوں روپے کے ہار، سہرے اور نقدی چوری، پانچ گھنٹے بعد بھی پولیس نہ پہنچی، دکاندار کا ویڈیو بیان سامنے آگیا

کوٹ سلطان : کوٹ سلطان مین اڈہ، مسجد سردار اڈہ والی گلی میں نامعلوم ملزمان دکان کی چھت توڑ کر لاکھوں روپے مالیت کے ہار، سہرے اور نقدی چوری کرکے فرار ہوگئے۔ متاثرہ دکاندار نے الزام عائد کیا ہے کہ 15 پر اطلاع دینے کے باوجود پولیس بروقت موقع پر نہ پہنچی، جبکہ پانچ گھنٹے گزرنے کے باوجود ایس ایچ او اور فرانزک ٹیم نے بھی جائے وقوعہ کا دورہ نہیں کیا۔
متاثرہ دکاندار کے مطابق ملزمان چھت توڑ کر دکان میں داخل ہوئے اور قیمتی سامان و نقدی لے کر فرار ہوگئے۔ دکاندار نے اپنے ویڈیو بیان میں پولیس کی مبینہ تاخیر پر تشویش کا اظہار کرتے ہوئے کہا کہ اطلاع دینے کے باوجود فوری کارروائی نہیں کی گئی۔
دکاندار کا دعویٰ ہے کہ پولیس اہلکار نے انہیں بتایا کہ متعلقہ افسر کی طبیعت ناساز ہے اور دکان بند رکھیں، لیہ سے فرانزک ٹیم آئے گی۔
واقعے کے بعد پولیس کی بروقت رسپانس اور جائے وقوعہ سے شواہد اکٹھے کرنے کے حوالے سے سوالات اٹھ رہے ہیں۔ متاثرہ دکاندار نے حکام سے مطالبہ کیا ہے کہ واقعے کا نوٹس لے کر ملزمان کو گرفتار کیا جائے اور چوری شدہ سامان برآمد کیا جائے۔