لیہ: وزیراعلیٰ پنجاب اور آئی جی پنجاب کے وژن ’’کرپشن فری پنجاب‘‘ کے تحت ڈی پی او لیہ حسن جاوید بھٹی کی زیر صدارت اردل روم کا انعقاد کیا گیا، جس میں محکمانہ نظم و ضبط، کارکردگی اور اہلکاروں کے خلاف شوکاز نوٹسز پر کارروائی کرتے ہوئے مجموعی طور پر 42 کیسز نمٹائے گئے۔ترجمان لیہ پولیس کے مطابق کرپشن کے الزام میں ایک اے ایس آئی کو محکمہ پولیس سے برخاست کر دیا گیا، جبکہ ناقص کارکردگی کا مظاہرہ کرنے پر 10 افسران کو سروس ضبطگی کی سزا سنائی گئی۔ شہریوں کے ساتھ ناروا سلوک برتنے پر چار اہلکاروں کی سروس ضبط کی گئی، جبکہ ناقص کارکردگی پر ایک سب انسپکٹر اور غیر حاضری پر دو کانسٹیبلان کو بھی سروس ضبطگی کی سزا دی گئی۔ترجمان کے مطابق معمولی کوتاہیوں پر پانچ افسران کو سنشور کی سزا دی گئی۔ ڈی پی او حسن جاوید بھٹی نے محکمانہ احتساب کے ذریعے پولیس میں نظم و ضبط، پیشہ ورانہ ذمہ داریوں اور عوام کے ساتھ بہتر رویے کو یقینی بنانے پر زور دیا۔
