لیہ(نمائندہ لیہ ٹی وی ) چوک اعظم شہر و تحصیل چوبارہ کے سرکاری سکولوں کے نادار، یتیم اور مستحق طلبا و طالبات میں سماجی تنظیم انووا گروپ آف کمپنیز کے تعاون سے یونیفارم تقسیم کیے گئے۔ ڈپٹی کمشنر آصف علی ڈوگر نے یونیفارم تقسیم کیے۔ اس سلسلہ میں ایک تقریب گورنمنٹ گرلز ہائی سکول چوک اعظم میں منعقد کی گئی جس میں سی ای او تعلیم ڈاکٹر عبد القیوم خان، افسران تعلیم، ڈی ای او رضوان گجر، شمشیر حسین، پروگرام کے بانی کوآرڈینیٹر گورنمنٹ مسلم ہائی سکول چوک اعظم کے انگلش ٹیچر مقبول ہراج، ملک عاطف نواز اور دیگر افسران، ہیڈ مسٹریس اور سکول معلمات موجود تھیں جبکہ طلبا و طالبات نے خوبصورت ٹیبلوز بھی پیش کیے۔ڈپٹی کمشنر آصف علی ڈوگر نے اس موقع پر گفتگو کرتے ہوئے کہا کہ مستحق اور کم آمدن والے طبقات کی مدد صدقہ جاریہ ہے۔ طالبات کی حوصلہ افزائی اور خود اعتمادی میں اضافہ کر کے ملک و قوم کا کارآمد شہری بنایا جا سکتا ہے۔ انہوں نے کہا کہ سکولوں میں مساوات اور ہم آہنگی کو فروغ دے کر بہتر معاشرے تشکیل دیے جا سکتے ہیں۔ انہوں نے کہا کہ وزیر اعلی پنجاب مریم نواز شریف تعلیم کے شعبہ خصوصا بچیوں کی تعلیم کے لئے بھرپور اقدامات اٹھا رہی ہیں ایک بچی کو تعلیم دینا ایک کنبے اور نسل کو تعلیم دینے کے برابر ہے سماجی تنظیموں اور مخیر حضرات کی طرف سے طلبہ کو یونیفارم کی فراہمی ایک قابل ستائش اقدام ہے جس سے خوبصورت معاشروں کی تشکیل ہوتی ہے۔انہوں نے کہا کہ انووا گروپ آف کمپنیز کے تعاون سے ضلع میں تقریباً 4500 طلبہ و طالبات کو یونیفارم فراہم کی جا رہی ہیں جس سے انہیں موسم کے مطابق ضروریات پوری کرنے میں مدد ملے گی۔ انہوں نے کہا کہ انووا گروپ آف کمپنیز نے ہمیشہ تعلیمی سرگرمیوں کے فروغ کے لئے مثبت اقدامات کیے ہیں۔تقریب میں نمایاں کارکردگی کا مظاہرہ کرنے والے پوزیشن ہولڈر طلبا و طالبات کو کیش انعامات سے بھی نوازا گیا۔ دریں اثنا ڈپٹی کمشنر نے سکول میں شجرکاری مہم کے تحت پودا لگایا۔ بعد ازاں گورنمنٹ بوائز مسلم ہائی سکول چوک اعظم میں بھی طلبا میں یونیفارم تقسیم کیے گئے اور شجرکاری مہم کے تحت پودے لگائے گئے۔
