ایڈیشنل ڈپٹی کمشنر ریونیو عابدہ فرید کا تحصیل چوبارہ کے سرکاری اداروں کا معائنہ، ٹی ایچ کیو ہسپتال، اراضی ریکارڈ سنٹر اور تحصیل آفس کا دورہ، سروس ڈیلیوری بہتر بنانے اور تعمیراتی منصوبہ بروقت مکمل کرنے کی ہدایت

لیہ(نمائندہ لیہ ٹی وی ) ایڈیشنل ڈپٹی کمشنر ریونیو عابدہ فرید نے تحصیل چوبارہ میں ٹی ایچ کیو ہسپتال، اراضی ریکارڈ سنٹر، تحصیل آفس اور زیر تعمیر اسسٹنٹ کمشنر ہاؤس کا معائنہ کیا۔ اس موقع پر اسسٹنٹ کمشنر چوبارہ ارشد ندیم بھی ان کے ہمراہ تھے۔انہوں نے اس موقع پر کہا کہ سرکاری اداروں میں شہریوں کو فراہم کی جانے والی سہولیات کے معیار کو مزید بہتر بنایا جائے اور سروس ڈیلیوری کے عمل کو شفاف اور موثر بنایا جائے۔انہوں نے ٹی ایچ کیو ہسپتال میں طبی سہولیات، اراضی ریکارڈ سنٹر میں شہریوں کو فراہم کی جانے والی خدمات جبکہ تحصیل آفس کے امور کا تفصیلی جائزہ لیا۔انہوں نے زیر تعمیر اسسٹنٹ کمشنر ہاؤس کا بھی معائنہ کیا اور تعمیراتی کام کی رفتار اور معیار کو چیک کرتے ہوئے ہدایت کی کہ منصوبہ مقررہ مدت میں مکمل کیا جائے۔ ایڈیشنل ڈپٹی کمشنر ریونیو عابدہ فرید نے ریونیو افسران کے اجلاس کی صدارت کی۔ اجلاس میں ریونیو سے متعلق امور، ریکارڈ کی درستگی، انتقالات، فرد کے اجرا اور دیگر انتظامی معاملات کا جائزہ لیا گیا