لیہ(نمائندہ لیہ ٹی وی )وزیر اعلی پنجاب مریم نواز شریف کے وژن کے مطابق صوبہ بھر میں امن و امان کی فضا برقرار رکھنے اور معاشرے میں بھائی چارے، برداشت اور ہم آہنگی کو فروغ دینے کے لیے اقدامات جاری ہیں۔اسی سلسلہ میں ڈپٹی کمشنر لیہ آصف علی ڈوگر کی زیر صدارت امن کمیٹی کے ممبران کا اجلاس منعقد ہوا۔اجلاس میں ڈسٹرکٹ پولیس آفیسر حسن جاوید بھٹی، ایڈیشنل ڈپٹی کمشنر جنرل شبیر احمد ڈوگر،ممبران علی رضا شاہ،عبد الرؤف،نصیر بھٹہ،ثقلین زیدی،علمدار حسین شاہ۔طلحہ زبیر ودیگر موجود تھے۔ڈپٹی کمشنر آصف علی ڈوگر نے اجلاس سے خطاب کرتے ہوئے کہا کہ ضلع لیہ میں پہلے بھی امن، بھائی چارے اور مذہبی ہم آہنگی کی مثبت روایت موجود ہے اور ضلعی انتظامیہ کا مقصد اس ماحول کو مزید مضبوط اور پائیدار بنانا ہے۔ انہوں نے کہا کہ معاشرے میں امن اور رواداری کا فروغ نہایت ضروری ہے کیونکہ جب معاشرے میں برداشت، احترام اور ہم آہنگی کا ماحول قائم ہوتا ہے تو لوگوں کے درمیان اعتماد بڑھتا ہے اور اجتماعی ترقی کے مواقع بھی پیدا ہوتے ہیں۔انہوں نے کہا کہ تمام مکاتب فکر کے علمائے کرام، معززین علاقہ اور امن کمیٹی کے ممبران معاشرے میں اتحاد، اخوت اور بھائی چارے کے فروغ کے لیے اپنا مثبت کردار ادا کریں۔ڈپٹی کمشنر نے کہا کہ منبر و محراب سے باہمی احترام، برداشت اور محبت اور پرامن معاشرے کو قائم رکھنے کے لئے درس و تدریس کو مزید عام کیا جائے کیونکہ یہی سوچ ایک مضبوط اور پرامن معاشرے کی تشکیل میں مددگار ثابت ہوتی ہے۔ڈسٹرکٹ پولیس آفیسر حسن جاوید بھٹی نے اس موقع پر کہا کہ ضلع بھر میں امن و امان کی صورتحال تسلی بخش ہے اور پولیس ضلعی انتظامیہ کے ساتھ مل کر امن کی فضا برقرار رکھنے کے لیے اپنا کردار ادا کر رہی ہے۔ انہوں نے کہا کہ شہری باہمی احترام اور بھائی چارے کو فروغ دیں اور اپنے اردگرد کے ماحول پر نظر رکھیں تاکہ معاشرے میں امن و سکون کا ماحول مزید مستحکم ہو۔اجلاس کے شرکاء نے اس عزم کا اظہار کیا کہ ضلع لیہ میں امن، بھائی چارے اور مذہبی ہم آہنگی کو فروغ دینے کے لیے مشترکہ طور پر اپنا کردار ادا کرتے رہیں گے۔
