رمضان المبارک کے لیے ضلعی انتظامیہ کے انتظامات مکمل، 70 ہزار خاندانوں کو رمضان نگہبان کارڈ ملیں گے.12 ہزار کارڈ گھر گھر پہنچا دیے گئے، 7 رمضان دسترخوان، گراں فروشی کے خلاف 35 پرائس کنٹرول مجسٹریٹس تعینات، ڈپٹی کمشنر آصف علی ڈوگر

لیہ (نمائندہ لیہ ٹی وی)رمضان المبارک کو خوش آمدید کہنے کے لیے ضلعی انتظامیہ نے تمام تر انتظامات مکمل کر لیے ہیں جبکہ عوام کو زیادہ سے زیادہ سہولیات کی فراہمی کے لیے طے شدہ لائحہ عمل پر عملدرآمد یقینی بنانے کے لیے افسران و اہلکاروں کی ڈیوٹیاں بھی تفویض کر دی گئی ہیں۔ وزیر اعلیٰ پنجاب مریم نواز شریف کی ہدایات پر ضلع لیہ میں 70 ہزار مستحق خاندانوں کو رمضان نگہبان کارڈ فراہم کیے جائیں گے جن کے ذریعے فی خاندان دس ہزار روپے کی مالی امداد دی جائے گی۔یہ بات ڈپٹی کمشنر لیہ آصف علی ڈوگر نے کمیٹی روم میں میڈیا بریفنگ دیتے ہوئے کہی۔ اس موقع پر ایڈیشنل ڈپٹی کمشنر جنرل شبیر احمد ڈوگر بھی موجود تھے۔ ڈپٹی کمشنر نے بتایا کہ اب تک 30 ہزار رمضان نگہبان کارڈ موصول ہو چکے ہیں جن میں سے 12 ہزار کارڈ گھر گھر پہنچائے جا چکے ہیں جبکہ باقی کارڈز کی تقسیم کا عمل تیزی سے جاری ہے۔ڈپٹی کمشنر نے واضح کیا کہ رمضان نگہبان کارڈ کے ذریعے دی جانے والی رقم پر کسی قسم کی کٹوتی نہیں کی جائے گی اور اگر کوئی مرچنٹ کٹوتی کا مرتکب پایا گیا تو اس کے خلاف فوری طور پر ایف آئی آر درج کی جائے گی۔ انہوں نے بتایا کہ مخیر حضرات کے تعاون سے ضلع بھر میں 7 رمضان دسترخوان قائم کیے جا رہے ہیں جہاں روزانہ 2 ہزار سے زائد روزہ دار افطاری کر سکیں گے۔ رمضان دسترخوان ڈی ایچ کیو ہسپتال لیہ، شوگر ملز کالونی گیٹ، کروڑ، فتح پور، چوک اعظم، چوبارہ اور رفیق آباد میں لگائے جائیں گے۔ڈپٹی کمشنر نے کہا کہ گراں فروشی اور ذخیرہ اندوزی کے سدباب کے لیے ضلع بھر میں 35 پرائس کنٹرول مجسٹریٹس کو مختلف مارکیٹیں تفویض کر دی گئی ہیں جبکہ قیمتوں کی کڑی نگرانی کی جائے گی۔ انہوں نے بتایا کہ پیرا فورس رمضان المبارک کے دوران صرف اشیائے خوردونوش کی قیمتوں کی پڑتال کی ذمہ داریاں انجام دے گی۔انہوں نے مزید بتایا کہ رمضان المبارک میں لیہ شہر میں ایک رمضان سہولت بازار جبکہ ضلع بھر میں پانچ سہولت آن دا گو بازار قائم کیے گئے ہیں جہاں مارکیٹ کی نسبت کم نرخوں پر معیاری اشیائے خوردونوش دستیاب ہوں گی۔ اس کے علاوہ مساجد، امام بارگاہوں اور دیگر مذہبی مقامات اور ان کے راستوں کی صفائی ستھرائی اور لائٹنگ کے بہترین انتظامات کیے جائیں گے۔ڈپٹی کمشنر آصف علی ڈوگر نے کہا کہ وزیر اعلیٰ پنجاب مریم نواز شریف کی ہدایت پر ضلعی انتظامیہ رمضان المبارک کے دوران فیلڈ میں متحرک رہے گی اور اس ماہ مقدس میں روزہ داروں سمیت تمام شہریوں کو زیادہ سے زیادہ سہولیات فراہم کی جائیں گی۔ انہوں نے کہا کہ ضلع لیہ کی ری شیپنگ کا عمل جاری ہے اور عوام کو آئندہ چھ ماہ میں واضح تبدیلی نظر آئے گی۔