لیہ:وزیر اعلیٰ پنجاب مریم نواز شریف کے وژن کے مطابق پنجاب ڈویلپمنٹ پروگرام کے تحت ضلع لیہ میں سڑکوں کی بحالی، تزئین و آرائش، ٹف ٹائلز کی تنصیب اور شہر کی خوبصورتی میں اضافے کے پیکج پر کام جلد شروع کیا جائے گا۔ اس سلسلہ میں ڈپٹی کمشنر آصف علی ڈوگر کی زیر صدارت کمیٹی روم میں جائزہ اجلاس منعقد ہوا۔اجلاس میں ایڈیشنل ڈپٹی کمشنر میونسپل سروسز شبیر احمد ڈوگر، اسسٹنٹ کمشنر لیہ فہد نور، ایکسیئن ہائی وے میاں سجاد، ڈپٹی ڈائریکٹر ڈویلپمنٹ عصمت اللہ، اسسٹنٹ ڈائریکٹر پلاننگ اسحاق کھیرانی اور نیسپاک کے افسران نے شرکت کی۔ اسسٹنٹ پراجیکٹ ڈائریکٹر انجینئر محمد سلیم نے پنجاب ڈویلپمنٹ پروگرام پیکج 8 کے تحت مجوزہ منصوبوں بارے تفصیلی بریفنگ دی۔ اجلاس میں بتایا گیا کہ پی ڈی پی پیکج 8 کے تحت لیہ شہر کی خوبصورتی، سڑکوں کی بحالی، تزئین و آرائش، لائٹس اور ٹف ٹائلز کی تنصیب کے مختلف منصوبوں پر مجموعی طور پر ایک ارب 80 کروڑ روپے لاگت آئے گی۔ منصوبے کے تحت مختلف شاہراہوں اور چوکوں کی بحالی، تزئین و آرائش اور ٹف ٹائلز کی تنصیب کی جائے گی۔ اجلاس سے خطاب کرتے ہوئے ڈپٹی کمشنر آصف علی ڈوگر نے کہا کہ پنجاب ڈویلپمنٹ پروگرام کے تحت جاری اور مجوزہ ترقیاتی منصوبوں کو اعلیٰ معیار کے ساتھ بروقت مکمل کیا جائے۔ سڑکوں کی بحالی اور تزئین و آرائش کے کام میں پائیداری، خوبصورتی اور ٹریفک کی روانی کو خصوصی اہمیت دی جائے۔ انہوں نے متعلقہ افسران کو ہدایت کی کہ منصوبے کی تکمیل کے دوران تمام ضروری تقاضوں کو مدنظر رکھتے ہوئے کام کی مؤثر نگرانی یقینی بنائی جائے۔ ڈپٹی کمشنر نے کہا کہ شہر کی اہم شاہراہوں کی بحالی، ٹف ٹائلز، لائٹس اور دیگر تزئین و آرائش کے اقدامات سے شہریوں کو بہتر سفری سہولیات میسر آئیں گی جبکہ شہر کی خوبصورتی میں بھی نمایاں اضافہ ہوگا۔







