لیہ(نمائندہ لیہ ٹی وی)یونیورسٹی آف لیہ میں پرائم منسٹر یوتھ لیپ ٹاپ سکیم کے تحت طلبہ میں 226 لیپ ٹاپ تقسیم کرنے کی پروقار تقریب منعقد ہوئی۔ تقریب کے مہمان خصوصی سابق ایم این اے پیر سید ثقلین شاہ بخاری تھے۔ تقریب میں ممبر صوبائی اسمبلی سمیہ عطاء شہانی، وائس چانسلر یونیورسٹی آف لیہ پروفیسر ڈاکٹر محمد زبیر ابوبکر، سابق ایم پی اے صاحبزادہ فیض الحسن سواگ، ایڈیشنل ڈپٹی کمشنر ریونیو محمد شاہد ملک، ملک عثمان اولکھ، حسنین گورمانی، ڈی ایس پی شوکت علی،ایچ سی سی کے نمائندگان، یونیورسٹی انتظامیہ، اساتذہ کرام اور طلبہ کی کثیر تعداد نے شرکت کی۔پیر سید ثقلین شاہ بخاری نے تقریب سے خطاب کرتے ہوئے کہا کہ جب میاں شہباز شریف وزیر اعلی پنجاب تھے تو انہوں نے ہونہار طلبہ میں لیپ ٹاپ تقسیم کرنے کا سلسلہ شروع کیا تھا اور اب بطور وزیراعظم اس پروگرام کو دوبارہ شروع کر کے یہ ثابت کیا ہے کہ وہ نوجوانوں کو نہیں بھولے۔ انہوں نے کہا کہ موجودہ دور ٹیکنالوجی کا دور ہے اور جدید علوم تک رسائی کے لیے ڈیجیٹل سہولیات ناگزیر ہو چکی ہیں لیپ ٹاپ کی فراہمی سے طلبہ اپنی تعلیمی سرگرمیوں میں نمایاں بہتری لا سکیں گے، ریسرچ کریں گے، آن لائن لرننگ سے مستفید ہوں گے اور عالمی تعلیمی پلیٹ فارمز تک رسائی حاصل کریں گے۔ انہوں نے کہا کہ ہمارے سیاسی قائدین نے ضلع لیہ میں تعلیمی ترقی کے لیے جو جدوجہد شروع کی تھی آج اس کے عملی ثمرات سامنے آ رہے ہیں۔ انہوں نے مزید کہا کہ یونیورسٹی کے لیے مزید فنڈز ریلیز کروائے جائیں گے اور یونیورسٹی آف لیہ سمیت ضلع بھر کے تمام تعلیمی اداروں کی بہتری کے لیے ہماری کاوشیں جاری رہیں گی تاکہ نوجوانوں کو زیادہ سے زیادہ سہولیات فراہم کی جا سکیں۔ممبر صوبائی اسمبلی سمیہ عطاء شہانی نے اپنے خطاب میں کہا کہ وزیر اعلی پنجاب مریم نواز شریف کی قیادت میں صوبہ بھر میں ترقی کا سفر تیزی سے جاری ہے اور تعلیم کے شعبہ پر خصوصی توجہ دی جا رہی ہے۔ انہوں نے کہا کہ حکومت نوجوانوں کو بااختیار بنانے کے لیے عملی اقدامات اٹھا رہی ہے اور لیپ ٹاپ سکیم اسی وژن کا حصہ ہے۔ انہوں نے طلبہ محنت اور لگن سے تعلیم حاصل کریں، میرٹ پر آپ کو یہ مواقع ملے ہیں اور آئندہ بھی میرٹ ہی کی بنیاد پر آگے بڑھنے کے مواقع فراہم کیے جائیں گے۔ انہوں نے کہا کہ جدید دور میں مصنوعی ذہانت اور ڈیجیٹل مہارتیں وقت کا تقاضا ہیں اور طلبہ کو چاہیے کہ وہ لیپ ٹاپ کے ذریعے اے آئی اور جدید علوم سیکھ کر ملک و قوم کی خدمت کریں۔وائس چانسلر یونیورسٹی آف لیہ پروفیسر ڈاکٹر محمد زبیر ابوبکر نے اپنے خطاب میں کہا کہ لیپ ٹاپ کی فراہمی مکمل طور پر میرٹ کی بنیاد پر شفاف انداز میں کی گئی ہے۔ انہوں نے کہا کہ یونیورسٹی آف لیہ تعلیمی ترقی، معیاری تحقیق اور جدید ٹیکنالوجی کے فروغ کے لیے کوشاں ہے یونیورسٹی میں تدریسی اور تحقیقی سرگرمیوں کو بہتر بنانے کے لیے اقدامات کیے جا رہے ہیں اور طلبہ کو ڈیجیٹل لرننگ کے مواقع فراہم کیے جا رہے ہیں۔ انہوں نے کہا کہ لیپ ٹاپ طلبہ کو ریسرچ، اسائنمنٹس، ڈیجیٹل لائبریریز اور آن لائن کورسز تک رسائی میں مدد فراہم کریں گے جس سے ان کی تعلیمی کارکردگی میں مزید نکھار آئے گا۔ انہوں نے طلبہ پر زور دیا کہ وہ اس سہولت سے بھرپور فائدہ اٹھائیں اور محنت و دیانتداری کو اپنا شعار بنائیں۔تقریب کے اختتام پر مہمانان گرامی نے طلبہ میں لیپ ٹاپ تقسیم کیے اور اس عزم کا اظہار کیا کہ نوجوان نسل کو جدید تعلیمی سہولیات کی فراہمی کا سلسلہ جاری رکھا جائے گا تاکہ وہ مستقبل کے چیلنجز کا بھرپور مقابلہ کر سکیں۔
