لیہ : ڈپٹی کمشنر لیہ آصف علی ڈوگر نے کہا ہے کہ حکومت پنجاب تعلیم کے فروغ، معیار میں بہتری اور طلبہ و طالبات کی حوصلہ افزائی کے لیے اقدامات کر رہی ہے۔ نمایاں تعلیمی کارکردگی کا مظاہرہ کرنے والے طلبہ کی پذیرائی سے نہ صرف ان کی حوصلہ افزائی ہوتی ہے بلکہ دیگر طلبہ میں بھی محنت اور آگے بڑھنے کا جذبہ پیدا ہوتا ہے۔انہوں نے ان خیالات کا اظہار بہادر ڈیجیٹل لائبریری کے آڈیٹوریم ہال میں نویں اور دسویں جماعت کے امتحانات میں نمایاں پوزیشنیں حاصل کرنے والے طلبہ و طالبات اور محکمہ اینٹی کرپشن کے زیر اہتمام منعقدہ مقابلوں میں کامیاب ہونے والے طلبہ کے اعزاز میں منعقدہ تقریب سے خطاب کرتے ہوئے کیا۔اس موقع پر ایڈیشنل ڈپٹی کمشنر سوشل سروسز خضر ظہور، ڈپٹی ڈائریکٹر کالجز ذوالفقار حیدری، چیف ایگزیکٹو آفیسر تعلیم عبدالحفیظ اور دیگر افسران بھی موجود تھے۔ڈپٹی کمشنر آصف علی ڈوگر نے کہا کہ تعلیم کسی بھی معاشرے کی ترقی اور خوشحالی کی بنیاد ہے۔ طلبہ اپنی تعلیم پر بھرپور توجہ دیں، محنت اور لگن کو اپنا شعار بنائیں اور اپنی صلاحیتوں کو مثبت سرگرمیوں میں بروئے کار لائیں۔ انہوں نے نوجوان نسل پر زور دیا کہ وہ بدعنوانی کے خلاف شعور اجاگر کرنے میں اپنا کردار ادا کرے تاکہ معاشرے میں دیانت داری، شفافیت اور احساسِ ذمہ داری کو فروغ دیا جا سکے۔تقریب کے اختتام پر نمایاں تعلیمی کارکردگی اور مقابلوں میں کامیابی حاصل کرنے والے طلبہ و طالبات میں سرٹیفکیٹس، شیلڈز اور انعامات تقسیم کیے گئے۔






