کمشنر ملتان سے نجی اسکول مالکان کی ملاقات، ٹریفک مسائل کے حل کیلئے اقدامات کی ہدایت

ملتان(لیہ ٹی وی)کمشنر ملتان ڈویژن عامر کریم خاں سے آفیسرز کالونی میں قائم پرائیویٹ سکولوں کے مالکان کی ملاقات کی۔کمشنر عامر کریم خاں نے سکولوں کے باہر ٹریفک جام کے سدباب کیلئے قابل عمل پلان مرتب کرنے کا حکم دیتے ہوئے کہا کہ تعلیمی اداروں کے باہر پارکنگ کا معقول انتظام ناہونا بھی ٹریفک مسائل کی وجہ ہے۔چھٹی کے وقت سڑکوں پر ٹریفک کے اژدہام کے سبب نظام ٹریفک بالکل مفلوج ہو کر رہ جاتا ہے۔آفیسر کالونی میں قائم تمام سکولز طلباءو طالبات کیلئے بسوں کا انتظام یقینی بنائیں۔پوش علاقوں میں قائم سکول قابل ذکر فیس وصول کرتے ہیں پک اینڈ ڈراپ سروس کا اہتمام کریں۔ ناقص منصوبہ بندی کے باعث سکول کھلنے اور چھٹی کے اوقات کار میں تعلیمی اداروں کے باہر ٹریفک کی بے ہنگم صورتحال نے اہل ملتان کو پریشانی میں مبتلا کررکھا ہے۔ہم سب پر باشعور شہری ہونے اور قانون کی پاسداری کرنے کی ذمہداری عائد ہوتی ہے۔ٹریفک کی روانی کو قائم رکھنے کیلئے ون وے کی خلاف ورزی سے اجتناب کریں۔ کمشنر عامر کریم خاں نے کہا کہ آفیسر کالونی میں قائم گول چوک کو مختصر کرنے بارے بھی ورکنگ کی جارہی ہے۔تمام پرائیویٹ سکول نمائندگان نے ڈویژنل انتظامیہ کو بھرپور تعاون کی یقین دہانی کروائی ہے۔