لیہ (نمائندہ لیہ ٹی وی) دفتر پولیس میں سائلین کی شنوائی کا سلسلہ جاری ہے۔ ڈسٹرکٹ پولیس آفیسر (ڈی پی او) محمد علی وسیم نے کھلی کچہری میں شہریوں کے مسائل سنے اور ان کے فوری حل کے احکامات جاری کیے۔ کھلی کچہری میں سائلین سعد اکبر، اللہ داد، شاہین بی بی، کرن بی بی، رخسانہ بی بی سمیت دیگر افراد نے اپنے مسائل پیش کیے۔ سائل اللہ داد نے مؤقف اختیار کیا کہ اس سے قرض لیا گیا مگر رقم واپس نہیں کی جا رہی، جس پر پولیس کارروائی کا مطالبہ کیا گیا۔ سائلہ شاہین بی بی نے شکایت کی کہ ملزمان نے چادر اور چار دیواری کا تقدس پامال کیا ہے، جس پر مقدمہ درج کرنے کی استدعا کی گئی۔ اسی طرح، سائلہ کرن بی بی نے الزام عائد کیا کہ اسے ذاتی رنجش کی بنا پر تشدد کا نشانہ بنایا گیا ہے، لہٰذا قانونی کارروائی کی جائے۔ ڈی پی او محمد علی وسیم نے موقع پر ہی متعلقہ افسران کو ہدایات جاری کرتے ہوئے تمام مسائل کے فوری اور میرٹ پر حل کی یقین دہانی کرائی۔ انہوں نے کہا کہ پولیس عوامی مسائل کے حل کے لیے ہر ممکن اقدامات کر رہی ہے اور شہریوں کو انصاف فراہم کرنا اولین ترجیح ہے۔
