اسلام آباد(لیہ ٹی وی)حکومتی مذاکراتی ٹیم نے تحریک انصاف (پی ٹی آئی) کے تحریری مطالبات پر شق وار جواب تیار کر لیا ہے۔ ذرائع کے مطابق حکومتی ٹیم نے واضح کیا ہے کہ 9 مئی کے واقعات پر جوڈیشل کمیشن تشکیل نہیں دیا جا سکتا، کیونکہ یہ مقدمات عدالتوں میں زیر بحث ہیں اور بعض ملزمان کو ملٹری کورٹس سے سزائیں بھی ہو چکی ہیں۔ حکومت کے تحریری جواب میں کہا گیا ہے کہ جوڈیشل کمیشن صرف ان معاملات پر بنایا جاتا ہے جو عدالت میں زیرِ بحث نہ ہوں۔ مزید یہ کہ 26 نومبر سے متعلق لاپتہ افراد اور گرفتار افراد کی تفصیلات فراہم کی جائیں، کیونکہ ان کے نام اور تفصیلات کے بغیر رہائی کے لیے کوئی قدم نہیں اٹھایا جا سکتا۔ تحریری جواب میں حکومت نے پی ٹی آئی سے یہ بھی کہا ہے کہ اگر ہلاکتوں کا دعویٰ کیا جا رہا ہے تو ان کی تفصیلات بھی فراہم کی جائیں۔ ذرائع کے مطابق حکومتی کمیٹی اپنا تحریری جواب اسپیکر قومی اسمبلی ایاز صادق کو پیش کرے گی۔ اسپیکر حکومتی جواب موصول ہونے کے بعد مذاکرات کے چوتھے اجلاس کے انعقاد کا فیصلہ کریں گے۔
