لیہ(نمائندہ لیہ ٹی وی) ڈپٹی کمشنر آصف علی ڈوگر نے ریسکیو 1122 کے زیر اہتمام سپورٹس کمپلیکس میں فلڈ پیشگی انتظامات کے سلسلہ میں منعقدہ پہلی ڈرائی موک ایکسرسائز کا معائنہ کیا۔ اس موقع پر ایڈیشنل ڈپٹی کمشنر ریونیو ڈاکٹر عابدہ فرید، اسسٹنٹ کمشنرز زوہیب کریم اور اصغر علی، ایڈیشنل ڈائریکٹر لائیو سٹاک ڈاکٹر طارق گدارہ، چیف ایگزیکٹو آفیسر ہیلتھ ڈاکٹر شاہد ریاض، ایکسیئن انہار عبدالرؤف اور متعلقہ افسران ان کے ہمراہ تھے۔ ڈپٹی کمشنر نے سول ڈیفنس، ہیلتھ، لائیو سٹاک، ریسکیو 1122 اور دیگر متعلقہ محکموں کی جانب سے قائم سٹالز کا تفصیلی معائنہ کیا اور دستیاب ساز و سامان کا جائزہ لیا۔ ڈسٹرکٹ ایمرجنسی آفیسر ڈاکٹر سجاد نے اس موقع پر موک ایکسرسائز کے اغراض و مقاصد اور ہنگامی صورتحال سے نمٹنے کے طریقہ کار کے بارے میں تفصیلی بریفنگ دی۔ ڈپٹی کمشنر آصف علی ڈوگر نے اس موقع پر کہا کہ ضلعی انتظامیہ ممکنہ سیلابی صورتحال سے بروقت اور مؤثر انداز میں نمٹنے کے لئے تیار ہے اور تمام انتظامات مکمل ہیں۔ انہوں نے کہا کہ پیشگی تیاری نہایت ضروری ہے اور موک ایکسرسائز سے کپیسٹی بلڈنگ میں اضافہ ہوتا ہے۔ انہوں نے کہا کہ تمام متعلقہ محکمے ہمہ وقت الرٹ رہیں اور اپنی مشینری و آلات کو فعال حالت میں رکھیں تاکہ کسی بھی ہنگامی صورتحال میں فوری ریسپانس یقینی بنایا جا سکے۔ انہوں نے مزید کہا کہ ڈرائی موک ایکسرسائز کا مقصد اداروں کے درمیان باہمی رابطہ مضبوط بنانا اور عملی مشق کے ذریعے استعداد کار میں اضافہ کرنا ہے تاکہ عوام کے جان و مال کا تحفظ یقینی بنایا جا سکے۔
