لیہ(نمائندہ لیہ ٹی وی)ڈپٹی کمشنر آصف علی ڈوگر کی زیر صدارت ڈسٹرکٹ ڈیزاسٹر مینجمنٹ اتھارٹی کا اجلاس کمیٹی روم میں منعقد ہوا۔ اجلاس میں ممکنہ سیلابی صورتحال سے نمٹنے کے لیے پیشگی انتظامات کا تفصیلی جائزہ لیا گیا۔ اجلاس میں ایڈیشنل ڈپٹی کمشنرز عابدہ فرید، شبیر احمد ڈوگر، اسسٹنٹ کمشنرز زوہیب کریم، اصغر علی اور متعلقہ محکموں کے افسران نے شرکت کی اور اپنے اپنے محکموں کی جانب سے کیے گئے اقدامات پر بریفنگ دی۔ ڈپٹی کمشنر نے ہدایت کی کہ ممکنہ سیلاب کے پیش نظر تمام محکمے ہائی الرٹ رہیں اور ہنگامی صورتحال سے نمٹنے کے لیے پیشگی تیاری مکمل رکھیں۔ انہوں نے ریسکیو، محکمہ انہار، لوکل گورنمنٹ، ہیلتھ اور لائیو اسٹاک سمیت دیگر متعلقہ اداروں کو ہدایت کی کہ مشینری، ادویات اور دیگر ضروری سامان کی دستیابی کو یقینی بنایا جائے۔ ڈپٹی کمشنر نے مزید ہدایت کی کہ دریاؤں اور ندی نالوں کی مسلسل نگرانی کی جائے اور حفاظتی بندوں کو مضبوط بنانے کے ساتھ حساس مقامات کی نشاندہی مکمل کی جائے۔ انہوں نے کہا کہ فلڈ ریلیف کیمپس کے قیام کے لیے مناسب مقامات کا انتخاب کیا جائے اور وہاں پینے کے صاف پانی، طبی سہولیات اور خوراک کی فراہمی کے انتظامات پہلے سے مکمل رکھے جائیں۔ انہوں نے متعلقہ افسران کو ہدایت کی کہ کسی بھی ہنگامی صورتحال میں فوری رسپانس کو یقینی بنانے کے لیے کنٹرول رومز کو فعال رکھا جائے تاکہ عوام کو بروقت آگاہی فراہم کی جاسکے۔
