گورنمنٹ ہائیر سیکنڈری سکول 139A/TDA لیہ میں داخلہ آگاہی واک کا انعقاد پرنسپل مہر عبدالمجید ونجھیرا کی قیادت میں والدین اور اہل علاقہ کی شرکت، سرکاری سکولوں میں معیاری تعلیم کیلئے داخلہ مہم تیز

لیہ(نمائندہ لیہ ٹی وی) وزیراعلیٰ پنجاب مریم نواز شریف کے احکامات اور صوبائی وزیر تعلیم کی ہدایات کے تحت صوبہ بھر میں داخلہ مہم جاری ہے۔ اسی سلسلہ میں گورنمنٹ ہائیر سیکنڈری سکول 139A/TDA لیہ میں داخلہ آگاہی واک کا انعقاد کیا گیا۔ واک کی قیادت پرنسپل مہر عبدالمجید ونجھیرا نے کی جبکہ سکول کونسل ممبران، اہل علاقہ، معززین اور والدین کی کثیر تعداد نے شرکت کی۔واک کے دوران شرکاء نے مختلف بینرز اور پلے کارڈز اٹھا رکھے تھے جن پر “سرکاری سکول، معیاری سکول” اور داخلہ مہم کے حوالے سے آگاہی پیغامات درج تھے۔اس موقع پر پرنسپل مہر عبدالمجید ونجھیرا نے کہا کہ وزیراعلیٰ پنجاب کے احکامات پر تعلیم کے فروغ کے لیے بھرپور اقدامات کیے جا رہے ہیں اور داخلہ مہم کو کامیاب بنانے کے لیے اساتذہ، سکول کونسل اور مقامی کمیونٹی متحرک کردار ادا کر رہی ہے۔ انہوں نے کہا کہ سرکاری تعلیمی اداروں میں جدید تدریسی طریقہ کار متعارف کروایا جا رہا ہے تاکہ طلبہ کو معیاری اور دورِ حاضر کے تقاضوں سے ہم آہنگ تعلیم فراہم کی جا سکے۔انہوں نے مزید کہا کہ حکومت پنجاب کی جانب سے مفت کتابوں کی فراہمی، بہتر کلاس روم ماحول، ہم نصابی سرگرمیوں کے فروغ اور اساتذہ کی پیشہ ورانہ تربیت جیسے اقدامات اس بات کا ثبوت ہیں کہ سرکاری سکولوں کا معیار مسلسل بہتر ہو رہا ہے والدین اپنے بچوں کو سرکاری سکولوں میں داخل کروا کر نہ صرف ان کے تعلیمی مستقبل کو محفوظ بنائیں بلکہ ایک تعلیم یافتہ معاشرے کی تشکیل میں بھی اپنا کردار ادا کریں۔پرنسپل مہر عبدالمجید ونجھیرا نے مزید کہا کہ یہ واک اسی سلسلہ کی ایک کڑی ہے جس کے ذریعے عوام میں شعور اجاگر کیا جا رہا ہے اور زیادہ سے زیادہ بچوں کے داخلے کو یقینی بنایا جا رہا ہے۔