ڈپٹی کمشنر آصف علی ڈوگر کا رات گئے پارکس اور فوڈ سٹریٹ کا دورہ، شہری سہولیات کا جائزہ صفائی، سکیورٹی اور روشنی کے نظام کو بہتر بنانے کی ہدایت، فوڈ آؤٹ لیٹس پر معیاری خوراک اور ایس او پیز پر عملدرآمد یقینی بنانے کا حکم

لیہ(نمائندہ لیہ ٹی وی) وزیراعلیٰ پنجاب مریم نواز شریف کے وژن کے تحت ڈپٹی کمشنر لیہ آصف علی ڈوگر رات گئے شہریوں کو بہتر تفریحی سہولیات کی فراہمی کے لیے متحرک رہے اور شہر کے مختلف پارکس کا تفصیلی دورہ کیا۔ ڈپٹی کمشنر نے لیڈیز پارک لیہ، فیملی پارک لیہ، جناح پارک لیہ، فضل جھکڑ پارک لیہ اور صدیق سینٹرل پارک لیہ کا معائنہ کیا جہاں صفائی ستھرائی، سکیورٹی انتظامات، روشنی کے نظام، بیٹھنے کی سہولیات اور دیگر عوامی سہولتوں کا جائزہ لیا۔ڈپٹی کمشنر کو میونسپل کمیٹی کے متعلقہ افسران نے پارکس میں جاری سہولیات اور انتظامات بارے بریفنگ دی۔ ڈپٹی کمشنر نے اس موقع پر کہا کہ پارکس میں آنے والے خاندانوں کو ہر ممکن سہولت فراہم کی جائے اور سکیورٹی و صفائی کے انتظامات میں کسی قسم کی غفلت برداشت نہیں کی جائے گی۔ انہوں نے مزید ہدایت کی کہ پارکس میں لائٹس کی مکمل فعالیت، واش رومز کی صفائی اور گرین بیلٹس کی دیکھ بھال کو ہر صورت یقینی بنایا جائے تاکہ شہری بہتر ماحول میں تفریح حاصل کر سکیں۔ڈپٹی کمشنر آصف علی ڈوگر نے اس موقع پر فوڈ سٹریٹ کا بھی معائنہ کیا اور وہاں دستیاب سہولیات، صفائی اور فوڈ سیفٹی انتظامات کا جائزہ لیا۔ انہوں نے کہا کہ فورٹ سٹریٹ ضلع لیہ کے لیے ایک خوبصورت اضافہ اور عوام کے لیے تحفہ ہے جہاں شہریوں کو معیاری اور متنوع کھانے دستیاب ہیں۔ انہوں نے ہدایت کی کہ فوڈ آؤٹ لیٹس پر صفائی، معیاری اشیاء خورونوش کی فراہمی اور حکومتی ایس او پیز پر مکمل عملدرآمد یقینی بنایا جائے تاکہ شہریوں کو بہترین اور محفوظ خوراک فراہم کی جا سکے۔ڈپٹی کمشنر نے مزید کہا کہ شہریوں کی تفریح اور سہولت حکومت پنجاب کی اولین ترجیحات میں شامل ہے اور اس ضمن میں تمام متعلقہ ادارے اپنی ذمہ داریاں احسن انداز میں ادا کریں تاکہ عوام کو معیاری سہولیات میسر آ سکیں۔