ضلع بھر میں غیر قانونی آئل یونٹس کے خلاف کارروائیاں جاری

لیہ(نمائندہ لیہ ٹی وی) ڈپٹی کمشنر/کنٹرولر سول ڈیفنس آصف علی ڈوگر کی ہدایت پر ضلع بھر میں غیر قانونی آئل یونٹس کے خلاف کارروائیاں جاری ہیں۔ اس سلسلے میں سول ڈیفنس لیہ کی ٹیم نے تھانہ فتح پور کے علاقہ میں کارروائی کرتے ہوئے غیر قانونی آئل یونٹس کے خلاف کریک ڈاؤن کیا۔کارروائی کے دوران تین آئل یونٹس کو سیل کر دیا گیا جبکہ دو غیر قانونی آئل یونٹس کو تحویل میں لے لیا گیا۔اس موقع پر موجود آلات اور دیگر سامان کا معائنہ کرتے ہوئے قانون کی خلاف ورزی پر فوری کارروائی عمل میں لائی گئی۔سول ڈیفنس آفیسر توقیر عباس نے کہا کہ غیر قانونی آئل یونٹس کسی بھی وقت حادثات کا باعث بن سکتے ہیں، اس لیے ایسے عناصر کے خلاف بلا امتیاز کارروائیاں جاری رہیں گی تاکہ شہریوں کے جان و مال کا تحفظ یقینی بنایا جا سکے۔