لیہ(نمائندہ لیہ ٹی وی)وزیر اعلیٰ پنجاب مریم نواز شریف کے وژن صحت مند پنجاب کی جانب ایک اور پیش رفت۔ کلینک آن ویلز کو متعلقہ تحصیل ہیڈ کوارٹر ہسپتال سے ہی ادویات فراہم کی جائیں گی۔ متعلقہ فارماسسٹ ادویات کا ریکارڈ رکھیں گے۔ چیف ایگزیکٹو آفیسر ہیلتھ ڈاکٹر شاہد ریاض نے یہ بات تھل ہسپتال کے معائنہ کے موقع پر کہی۔ کوآرڈینیٹر ڈاکٹر مزمل کریم بھی ان کے ہمراہ تھے۔ سی ای او ہیلتھ ڈاکٹر شاہد ریاض نے بتایا کہ ضلع میں مرکزی میڈیسن سٹور ڈسٹرکٹ ہیڈ کوارٹر ہسپتال میں قائم ہے جبکہ تحصیل ہسپتالوں اور دیگر صحت مراکز کے اپنے میڈیسن سٹور کام کر رہے ہیں جنہیں ڈیمانڈ کے مطابق ادویات فراہم کی جاتی ہیں۔ انہوں نے بتایا کہ سیکرٹری ہیلتھ نادیہ ثاقب کی ہدایت پر کلینک آن ویلز کو ادویات کی فراہمی متعلقہ تحصیل ہیڈ کوارٹر ہسپتال سے فراہم کئے جانے کا ڈیجٹلائزڈ میکنزم بنایا گیا ہے اور اس سلسلہ میں متعلقہ ایم ایس صاحبان اور فارماسسٹ کو ضروری ہدایات جاری کر دی گئی ہیں۔ سی ای او ہیلتھ ڈاکٹر شاہد ریاض ان اس موقع پر تھل ہسپتال کا تفصیلی دورہ کیا اور صفائی ستھرائی انتظامات، ڈاکٹرز، سٹاف کی حاضری اور ادویات کی دستیابی کا جائزہ لیا۔ سی ای او ہیلتھ نے ہسپتال کے میڈیسن سٹور کا بھی معائنہ کیا اور صحت سہولیات کی مزید بہتری کے لئے ہدایات دیں۔
