میٹرک امتحانات کا آغاز، شفاف انعقاد کیلئے امتحانی مراکز کی مانیٹرنگ کا عمل تیز اے ڈی سی جی شبیر احمد ڈوگر کا گورنمنٹ کالج آف کامرس امتحانی سینٹر کا دورہ، سہولیات اور انتظامات کا جائزہ

لیہ(نمائندہ لیہ ٹی وی) ڈیرہ غازی خان بورڈ کے زیر اہتمام میٹرک کے پہلے سالانہ امتحانات کا اغاز ہو گیا ہے۔ ڈپٹی کمشنر آصف علی ڈوگر کی ہدایت پر ضلع لیہ میں قائم امتحانی مراکز کی مانیٹرنگ کا عمل شروع کر دیا گیا ہے۔ اس سلسلہ میں ایڈیشنل ڈپٹی کمشنر جنرل شبیر احمد ڈوگر نے امتحانات کے شفاف انعقاد کے لیے گورنمنٹ کالج آف کامرس میں قائم امتحانی سینٹر کا دورہ کیا۔ اے ڈی سی جی نے امتحانی سینٹر کا معائنہ کیا اور سہولیات کا جائزہ لیا۔ اس موقع پر ڈائریکٹر کالجز ڈاکٹر خادم حسین اور ڈپٹی ڈائریکٹر کالجز ذوالفقار علی حیدری بھی ان کے ہمراہ تھے۔ اے ڈی سی جی نے اس موقع پر امیدوار امتحان کی رول نمبر سلپس، سٹاف کی حاضری، موجودگی چیک کی اور امتحانی عمل کا جائزہ لیا۔ اے ڈی سی جی نے امتحانی سینٹر میں پینے کے پانی کی دستیابی اور بجلی سمیت دیگر سہولیات کا بھی جائزہ لیا۔ اے ڈی سی جی نے کہا کہ شفاف امتحانات کا انعقاد ترقی کا پہلا مرحلہ ہے اور اس کے لئے تمام اداروں کو فرائض ذمہ داری کے ساتھ انجام دینے ہوں گے۔