وزیر اعلیٰ پنجاب مریم نواز شریف کی ہدایت پر ضلع لیہ میں بھی 28 مارچ کو ارتھ آور منایا جائے گا

لیہ(نمائندہ لیہ ٹی وی) وزیر اعلیٰ پنجاب مریم نواز شریف کی ہدایت پر ضلع لیہ میں بھی 28 مارچ کو ارتھ آور منایا جائے گا۔ ضلعی انتظامیہ کی جانب سے ماحولیاتی تحفظ اور توانائی کے مؤثر استعمال سے متعلق عالمی مہم ارتھ آور (Earth Hour) کے ساتھ اظہارِ یکجہتی کے طور پر ضلع بھر میں ارتھ آور منایا جائے گا۔ اس موقع پر ماحولیاتی تبدیلی کے بارے میں آگاہی پیدا کرنے کے لیے منتخب سرکاری عمارتوں اور مشہور مقامات کی بتیاں 28 مارچ کو رات 8:30 بجے سے 9:30 بجے تک بطور علامتی اقدام بند رکھی جائیں گی۔ ضلعی انتظامیہ کے مطابق اس دوران سرکاری عمارتوں، مشہور لینڈ مارکس، پارکس اور گھروں کی غیر ضروری روشنیاں بند رکھی جائیں گی اور عوام کو بھی لائٹس بند رکھنے کی ترغیب دی جائے گی جبکہ پارکس کی لائٹس بھی ایک گھنٹے کے لیے بند کی جائیں گی۔ اس کے علاوہ ماحول دوست سرگرمیوں کے فروغ کے لیے شجرکاری کی جائے گی اور ماحولیاتی واک کا بھی اہتمام کیا جائے گا۔ ضلعی انتظامیہ کا کہنا ہے کہ یہ سرگرمیاں پائیدار طرزِ زندگی کو فروغ دینے اور توانائی کے ذمہ دارانہ استعمال کی حوصلہ افزائی کی عکاس ہیں۔ شہریوں سے بھی اپیل کی گئی ہے کہ وہ اس مہم میں بڑھ چڑھ کر حصہ لیں، غیر ضروری روشنیاں بند کریں اور روزمرہ زندگی میں ماحول دوست عادات اپنائیں۔ واضح رہے کہ ارتھ آور عالمی سطح پر ورلڈ وائیڈ فنڈ فار نیچر (WWF) کے زیر اہتمام منایا جاتا ہے، جس کا مقصد دنیا بھر میں ماحولیاتی تحفظ اور موسمیاتی تبدیلی کے حوالے سے شعور اجاگر کرنا ہے۔ ضلعی انتظامیہ نے اس عزم کا اعادہ کیا ہے کہ ماحول کے تحفظ اور موسمیاتی بہتری کے لیے ایسی مثبت کاوشوں کی مکمل حمایت جاری رکھی جائے گی۔