ڈسٹرکٹ ڈرگ کوالٹی کنٹرول بورڈ کا اجلاس، خلاف ورزی پر میڈیکل سٹورز کے خلاف کارروائیاں تیز دو کیسز میں پراسیکیوشن کی منظوری، تین میڈیکل سٹورز کو شوکاز نوٹس، غیر معیاری ادویات کے کاروبار پر زیرو ٹالرنس پالیسی کا اعلان

لیہ(نمائندہ جنگ)ایڈیشنل ڈپٹی کمشنر جنرل شبیر احمد ڈوگر کی زیر صدارت ڈسٹرکٹ ڈرگ کوالٹی کنٹرول بورڈ کا اجلاس منعقد ہوا جس میں مختلف کیسز کا جائزہ لیا گیا۔ اجلاس کے دوران دو افراد کی غیر حاضری کا نوٹس لیا گیا جبکہ دو کیسز میں پراسیکیوشن کی منظوری دی گئی۔ مزید دو کیسز کو ری چیکنگ کے لیے بھجوانے کے احکامات جاری کئے گئے اور ایک میڈیکل سٹور کو وارننگ دی گئی۔اجلاس میں قوانین کی خلاف ورزی پر تین میڈیکل سٹورز کو ڈی سیل کرنے کے بعد انسپکشن کے لیے پیش ہونے کا پابند بنایا گیا اور تینوں کو شوکاز نوٹس جاری کرنے کے احکامات دیے گئے۔ اس موقع پر ایڈیشنل ڈپٹی کمشنر جنرل شبیر احمد ڈوگر نے اجلاس سے خطاب کرتے ہوئے کہا کہ ادویات کے کاروبار میں کسی قسم کی غفلت یا لاپرواہی برداشت نہیں کی جائے گی قوانین پر سختی سے عملدرآمد یقینی بنایا جائے اور عوام کو معیاری و محفوظ ادویات کی فراہمی ہر صورت یقینی بنائی جائے، خلاف ورزی کے مرتکب عناصر کے خلاف بلا امتیاز کارروائی جاری رکھی جائے گی۔اس موقع پر چیف ایگزیکٹو آفیسر ہیلتھ ڈاکٹر شاہد ریاض،سیکرٹری بورڈ عامر شکیل ودیگر موجود تھے۔