لیہ(نمائندہ لیہ ٹی وی) ڈپٹی کمشنر آصف علی ڈوگر کی زیر صدارت ڈسٹرکٹ پرزن ہیلتھ کونسل کا اجلاس کمیٹی روم میں منعقد ہوا۔ اجلاس میں ایڈیشنل ڈپٹی کمشنر جنرل شبیر احمد ڈوگر، چیف ایگزیکٹو آفیسر ہیلتھ ڈاکٹر شاہد ریاض، سپرنٹینڈنٹ ڈسٹرکٹ جیل کامران حیدر، میڈیکل سپرنٹینڈنٹ ڈسٹرکٹ ہیڈ کوارٹر ہسپتال ڈاکٹر غلام محی الدین، کنسلٹنٹ ڈاکٹر تحسین اختر اور متعلقہ افسران نے شرکت کی۔ ڈپٹی کمشنر نے ہیلتھ کونسل میں پیش کی جانے والی سفارشات کی روشنی میں ڈسٹرکٹ جیل میں مائنر آپریشن تھیٹر قائم کرنے کے لئے اقدامات اٹھانے کی ہدایات جاری کر دیں۔ ڈپٹی کمشنر نے جیل میں سائیکالوجسٹ کی مستقل تعیناتی کے لئے ہوم ڈیپارٹمنٹ کو مراسلہ لکھنے کی بھی ہدایت کی۔ ڈپٹی کمشنر نے اجلاس سے خطاب کرتے ہوئے کہا کہ جیل اسیران کے لئے ضروری ادویات اور ٹیسٹ کٹ کی فراہمی کو یقینی بنایا جائے۔ انہوں نے ہدایت کی کہ جیل میں ہر پندرہ دن بعد مچھر مار سپرے کروایا جائے۔ ڈپٹی کمشنر نے مزید ہدایت کی کہ ڈسٹرکٹ جیل ہسپتال کے ری ویمپنگ کے کام کو جلد مکمل کیا جائے۔
