لیہ(نمائندہ لیہ ٹی وی)نماز تراویح کی ڈیوٹی کے دوران تھانہ صدر لیہ کی حدود میں نامعلوم ملزمان کی فائرنگ سے شہید ہونے والے پولیس اہلکار کانسٹیبل اسد نصیر کی نماز جنازہ پولیس لائنز لیہ میں مکمل سرکاری اعزاز کے ساتھ ادا کر دی گئی۔ اس موقع پر پولیس کے چاک و چوبند دستے نے شہید کو سلامی پیش کی جبکہ قومی پرچم میں لپٹے شہید کے جسد خاکی پر اعلیٰ افسران نے پھولوں کی چادریں چڑھائیں۔نماز جنازہ میں ریجنل پولیس آفیسر ڈی جی خان محمد اظہر اکرم، ڈسٹرکٹ پولیس آفیسر لیہ حسن جاوید بھٹی، ڈسٹرکٹ اینڈ سیشن جج علی نواز خان، ڈپٹی کمشنر آصف علی ڈوگر،ایم این اے اویس نیاز جکھڑ سمیت پولیس و انتظامیہ کے دیگر اعلیٰ افسران، سکیورٹی اداروں کے نمائندگان، بار ایسوسی ایشن کے عہدیداران، میڈیا نمائندگان، پولیس افسران و اہلکاران، سیاسی و سماجی شخصیات اور شہریوں کی بڑی تعداد نے شرکت کی۔ شہید کے اہل خانہ بھی اس موقع پر موجود تھے۔تفصیلات کے مطابقگذشتہ شب تھانہ صدر لیہ کی حدود میں واقع ہیرا اڈہ کے قریب نامعلوم ملزمان کی فائرنگ سے کانسٹیبل اسد نصیر شہید ہو گئے تھے۔ شہید کی نماز جنازہ پولیس لائنز لیہ میں سرکاری اعزاز کے ساتھ ادا کی گئی جہاں آر پی او محمد اظہر اکرم نے شہید کے جسد خاکی پر پھولوں کی چادر چڑھائی اور ان کے درجات کی بلندی کے لیے دعا کی۔اس موقع پر آر پی او محمد اظہر اکرم نے شہید کے ورثاء سے ملاقات کر کے اظہار تعزیت کیا اور شہید کی قربانی کو زبردست خراج تحسین پیش کیا۔ انہوں نے کہا کہ فرض کی راہ میں اپنی جان قربان کرنے والے اہلکار ہمارے ماتھے کا جھومر ہیں اور پولیس فورس کو ان پر فخر ہے۔ انہوں نے یقین دہانی کرائی کہ شہید کے خاندان کو کسی صورت تنہا نہیں چھوڑا جائے گا اور ان کی مکمل کفالت کی جائے گی۔ڈسٹرکٹ پولیس آفیسر لیہ حسن جاوید بھٹی نے اس موقع پر کہا کہ شہید کا خون رائیگاں نہیں جائے گا اور اس واقعے میں ملوث ملزمان کو جلد قانون کے کٹہرے میں لا کر کیفر کردار تک پہنچایا جائے گا۔نماز جنازہ کے بعد شہید کے جسد خاکی کو مکمل سرکاری اعزاز کے ساتھ ان کے آبائی علاقے روانہ کر دیا گیا جہاں انہیں پورے سرکاری اعزاز کے ساتھ سپرد خاک کیا جائے گا۔
