لیہ(نمائندہ لیہ ٹی وی) ڈپٹی کمشنر آصف علی ڈوگر کی زیر صدارت عید الفطر انتظامات کاجائزہ اجلاس منعقد ہوا۔اجلاس میں ایڈیشنل ڈپٹی کمشنر جنرل شبیر احمد ڈوگر،اسسٹنٹ کمشنرز زوہیب کریم،اصغر علی چیمہ،ارشد ندیم،سی او ایم سیز،سی او ضلع کونسل ودیگر متعلقہ افسران موجود تھے۔ڈپٹی کمشنر آصف علی ڈوگر نے اجلاس سے خطاب کرتے ہوئے کہا کہ وزیر اعلیٰ پنجاب مریم نواز شریف کے احکامات پر شہریوں کو عیدالفطر کے موقع پر بہترین سہولیات کی فراہمی ضلعی انتظامیہ کی اولین ترجیح ہے۔ انہوں نے کہا کہ عید کے ایام میں شہریوں کو صاف ستھرا اورخوشگوار ماحول فراہم کرنے کے لیے تمام ادارے بھرپور اقدامات یقینی بنائیں۔ڈپٹی کمشنر نے کہا کہ تمام محکمے عیدالفطر کے موقع پر اپنے ڈیوٹی روسٹر فوری طور پر مرتب کرکے عملدرآمد یقینی بنائیں۔ انہوں نے کہا کہ عیدگاہوں، مرکزی مساجد اور امام بارگاہوں کی خصوصی صفائی کا جامع پلان بنایا جائے اور نماز عید کے اجتماعات کے پیش نظر صفائی ستھرائی کے انتظامات ہر صورت مکمل کیے جائیں جبکہ ان مقامات پر چونے اور پانی کے چھڑکاؤ کو بھی یقینی بنایا جائے تاکہ ماحول کو صاف، خوشگوار رکھا جا سکے۔انہوں نے مزید کہا کہ شہر کے پارکوں کی صفائی،تزئین و آرائش اور لائٹس کی بحالی پر خصوصی توجہ دی جائے تاکہ شہری عید کے موقع پر تفریحی مقامات سے بھرپور استفادہ کر سکیں سیوریج نظام کی بہتری، نکاسی آب کے مسائل کے فوری حل اور گلی محلوں میں صفائی کے انتظامات کو بھی بہتر بنایا جائے۔ڈپٹی کمشنر نے کہا کہ متعلقہ ادارے باہمی رابطے کو مؤثر بنائیں اور تمام انتظامات کی خود نگرانی کریں تاکہ عیدالفطر کے موقع پر کسی قسم کی غفلت یا کوتاہی برداشت نہ کی جائے۔
