لیہ(نمائندہ لیہ ٹی وی) ایڈیشنل ڈپٹی کمشنر ریونیو عابدہ فرید نے کہا ہے کہ وزیر اعلیٰ پنجاب مریم نواز شریف کے وژن کے مطابق رمضان نگہبان کارڈ کی فراہمی کا عمل خوش اسلوبی سے مکمل کر لیا گیا ہے۔ ضلع بھر میں 68 ہزار مستحق خاندانوں کو رمضان نگہبان کارڈ پہنچایا گیا۔ انہوں نے یہ بات دفتر اسسٹنٹ ڈائریکٹر زراعت میں قائم رمضان نگہبان کیمپ سائٹ کے دورہ کے موقع پر گفتگو کرتے ہوئے کہی۔ اسسٹنٹ کمشنر لیہ زوہیب کریم اس موقع پر ان کے ہمراہ تھے۔ ایڈیشنل ڈپٹی کمشنر ریونیو عابدہ فرید نے کہا کہ ضلع بھر میں وزیر اعلیٰ رمضان نگہبان کارڈ کی تقسیم اور رقوم کی ادائیگی کا مرحلہ انتہائی شفافیت، بروقت اور خوش اسلوبی سے مکمل کر لیا گیا ہے۔ انہوں نے متعلقہ افسران اور ٹیموں کو بہترین انتظامات اور خدمات انجام دینے پر شاباش دی۔ اے ڈی سی آر نے کہا کہ وزیر اعلیٰ رمضان نگہبان کارڈ مستحق افراد کی ماہ صیام میں مالی امداد کے لئے جاری کئے گئے جس میں دس ہزار روپے کی رقم رکھی گئی تھی۔ انہوں نے کہا کہ تمام مراحل بروقت مکمل کر لئے گئے ہیں اور حقداروں کو ان کا حق گھر کی دہلیز پر فراہم کیا گیا۔
