ڈسٹرکٹ پبلک سکول فتح پور میں سالانہ تقریبِ تقسیمِ انعامات

لیہ( نمائندہ جنگ)ڈسٹرکٹ پبلک سکول فتح پور میں سالانہ تقریبِ تقسیمِ انعامات منعقد ہوئی جس کے مہمان خصوصی اسسٹنٹ کمشنر اصغر علی چیمہ تھے۔اس موقع پر والدین اور اساتذہ بھی موجود تھے۔ تقریب میں سکول کے طلبہ نے مختلف رنگا رنگ پروگرام پیش کیے۔اسسٹنٹ کمشنر اصغر علی چیمہ نے تقریب سے خطاب کرتے ہوئے کہا کہ غیر نصابی سرگرمیاں طلبہ کی شخصیت سازی میں کلیدی کردار ادا کرتی ہیں۔ انہوں نے کہا کہ بچے قوم کا قیمتی سرمایہ اور ملک کا روشن مستقبل ہیں، اس لیے ان کی بہتر تعلیم و تربیت ہم سب کی مشترکہ ذمہ داری ہے۔ انہوں نے اساتذہ اور سکول انتظامیہ کی کاوشوں کو سراہتے ہوئے کہا کہ ڈسٹرکٹ پبلک سکول میں طلبہ کو معیاری تعلیم فراہم کی جا رہی ہے جو قابلِ تحسین ہے۔تقریب کے اختتام پر اسسٹنٹ کمشنر اصغر علی چیمہ نے نمایاں کارکردگی دکھانے والے طلبہ میں انعامات تقسیم کیے اور ان کی حوصلہ افزائی کی۔