پٹرولنگ پولیس ضلع لیہ کیشہریوں میں ٹریفک قوانین کی اہمیت کیلئے روڈ سیفٹی آگاہی مہم

لیہ( نمائندہ لیہ ٹی وی )ڈی ایس پی پٹرولنگ ضلع لیہ راؤ عمر فاروق نے کہا ہے کہ روڈ سیفٹی آگاہی مہم کا مقصد شہریوں میں ٹریفک قوانین کی اہمیت اجاگر کرنا اور قیمتی انسانی جانوں کو محفوظ بنانا ہے۔ انہوں نے یہ بات روڈ سیفٹی آگاہی مہم کے سلسلے میں شہریوں اور ڈرائیورز کو دیے گئے خصوصی لیکچرز کے دوران کہی۔انہوں نے کہا کہ پنجاب ہائی وے پٹرولنگ کی جانب سے عوام کو لین لائن کی پابندی، ہیلمٹ اور سائیڈ مررز کے استعمال، اوور اسپیڈنگ سے گریز اور محتاط ڈرائیونگ کے حوالے سے آگاہ کیا جا رہا ہے موٹر سائیکل سواروں کو ہیلمٹ پہننے، ٹرپل سواری سے اجتناب کرنے اور سائیڈ شیشے لگانے کی ہدایت کی گئی۔ڈی ایس پی راؤ عمر فاروق نے کہا کہ تیز رفتاری، غلط اوورٹیکنگ اور ٹریفک قوانین کی خلاف ورزی حادثات کی بڑی وجوہات ہیں عید کے ایام کے پیش نظر بسوں کی چھتوں پر سفر کی اجازت نہیں ہوگی جبکہ اسکول رکشوں میں بچوں کو غیر محفوظ انداز میں بٹھانے اور جعلی نمبر پلیٹس استعمال کرنے والوں کے خلاف سخت قانونی کارروائی کی جائے گی۔انہوں نے کہا کہ ان اقدامات کا مقصد چالان کرنا نہیں بلکہ انسانی جانوں کا تحفظ ہے۔ شہری ٹریفک قوانین پر عمل کر کے محفوظ سفر کو یقینی بنائیں۔