عالمی یوم خواتین کے موقع پر سوشل ویلفیئر کمپلیکس لیہ میں ہاتھ سے بنی اشیاء اور دستکاریوں کی نمائش کا انعقاد

لیہ( نمائندہ لیہ ٹی وی )عالمی یوم خواتین کے موقع پر سوشل ویلفیئر کمپلیکس لیہ میں ہاتھ سے بنی اشیاء اور دستکاریوں کی نمائش کا انعقاد کیا گیا۔نمائش کا افتتاح ممبر صوبائی اسمبلی سمعیہ عطاء شہانی اور ایڈیشنل ڈپٹی کمشنر ریونیو عابدہ فرید نے کیا۔ اس موقع پر ڈپٹی ڈائریکٹر سوشل ویلفیئر خضر حیات خان، مینجر صنعت زار طاہرہ سعادت، ڈاکٹر محمد یونس کلیہ،اسسٹنٹ ڈائریکٹرز صائمہ سیماب، مخدوم جاوید عباس،ڈسٹرکٹ انچارج ماری سٹوپس نوید ظفر سمرا سمیت دیگر افسران بھی موجود تھے۔ نمائش میں صنعت زار، ماری سٹوپس، گورنمنٹ کالج آف ٹیکنالوجی اور دیگر اداروں کی جانب سے مختلف سٹالز لگائے گئے جن میں خواتین کی تیار کردہ ہاتھ سے بنی اشیاء، دستکاریاں اور دیگر ہنر مندانہ مصنوعات پیش کی گئیں۔ممبر صوبائی اسمبلی سمعیہ عطاء شہانی اور ایڈیشنل ڈپٹی کمشنر ریونیو عابدہ فرید نے مختلف سٹالز کا معائنہ کیا اور خواتین کی جانب سے تیار کردہ اشیاء کو سراہا۔ اس موقع پر ممبر صوبائی اسمبلی سمعیہ عطاء شہانی نے کہا کہ وزیر اعلی پنجاب مریم نواز شریف خواتین کی فلاح و بہبود، خود مختاری اور معاشی ترقی کے لئے عملی اقدامات کر رہی ہیں۔انہوں نے کہا کہ حکومت پنجاب خواتین کو بااختیار بنانے کے لئے مختلف منصوبوں پر کام کر رہی ہے جن میں ہنر مند بنانے کے پروگرامز، روزگار کے مواقع، تعلیم اور صحت کی سہولیات کی فراہمی شامل ہیں۔ انہوں نے کہا کہ اس نوعیت کی نمائشیں خواتین کے ہنر کو اجاگر کرنے اور مقامی دستکاری کو فروغ دینے کا بہترین ذریعہ ہیں جس سے نہ صرف خواتین کو معاشی مواقع ملتے ہیں بلکہ مقامی ثقافت اور ہنر کو بھی تقویت ملتی ہے۔ایڈیشنل ڈپٹی کمشنر ریونیو عابدہ فرید نے اس موقع پر کہا کہ ضلع انتظامیہ خواتین کی ترقی اور انہیں بااختیار بنانے کے لئے کئے جانے والے اقدامات کی مکمل سرپرستی کر رہی ہے۔انہوں نے کہا کہ ایسی نمائشیں خواتین کے ہنر کو سامنے لانے اور انہیں معاشی طور پر مضبوط بنانے میں اہم کردار ادا کرتی ہیں۔ انہوں نے متعلقہ اداروں کی کاوشوں کو سراہتے ہوئے کہا کہ خواتین کی دستکاری اور ہنر کو فروغ دینے کے لئے اس طرح کی سرگرمیوں کا تسلسل جاری رکھا جائے گا تاکہ زیادہ سے زیادہ خواتین مستفید ہو سکیں۔