ضلع لیہ کی تاریخ میں پہلی بار گرین پراپرٹی سرٹیفکیٹ کا اجراء شروع کر دیا گیا

لیہ (نمائندہ لیہ ٹی وی) وزیر اعلیٰ پنجاب مریم نواز شریف کے وژن کے مطابق زرعی اراضی کے تحفظ کے لئے اہم قدم۔ ضلع لیہ کی تاریخ میں پہلی بار گرین پراپرٹی سرٹیفکیٹ کا اجراء شروع کر دیا گیا۔ ڈپٹی کمشنر آصف علی ڈوگر نے پلس پراجیکٹ سے ونڈا شدہ رقبہ کا پہلا گرین سرٹیفکیٹ اراضی مالک کو دیا۔ تفصیلات کے مطابق ضلع لیہ کی تاریخ میں ایک اہم اور تاریخی سنگِ میل اس وقت عبور کیا گیا جب پہلا گرین پراپرٹی سرٹیفکیٹ باقاعدہ طور پر جاری کیا گیا۔ اس سلسلہ میں ڈپٹی کمشنر آصف علی ڈوگر نے اپنے دفتر میں اراضی مالک کو گرین سرٹیفکیٹ دیا۔ اس موقع پر جی آئی ایس منیجر پلس وقاص شفیع اور لینڈ ریکارڈ آفیسر محمد شاہد بھی موجود تھے۔ اس موقع پر چک نمبر 431 ٹی ڈی اے کے رہائشی محمد ارشد قمر، جنہوں نے گرین پراپرٹی سرٹیفکیٹ کے حصول کے لیے درخواست دی تھی، کو ضلع لیہ کی تاریخ کا پہلا گرین پراپرٹی سرٹیفکیٹ جاری کیا گیا۔ سرٹیفکیٹ کے حصول پر محمد ارشد قمر (مالکِ اراضی) نے ڈپٹی کمشنر لیہ اور بالخصوص وزیرِ اعلیٰ پنجاب محترمہ مریم نواز کا تہہ دل سے شکریہ ادا کیا۔ ڈپٹی کمشنر آصف علی ڈوگر نے اس موقع پر گفتگو کرتے ہوئے کہا کہ سرٹیفکیٹ کے اجرا کے بعد اراضی مالک کا زمین پر قبضہ مکمل طور پر تصدیق شدہ ہو چکا ہے اور اب ان کی پراپرٹی ہر قسم کے قانونی و انتظامی معاملات کے حوالے سے محفوظ ہو گئی ہے۔