لیہ: ڈپٹی کمشنر آصف علی ڈوگر سے نیشنل ہائی وے اتھارٹی (این ایچ اے) کے حکام نے ان کے دفتر میں ملاقات کی، جس میں لیہ تونسہ پل اپروچ روڈ پر جاری تعمیراتی کام کی پیش رفت اور رفتار کے حوالے سے تفصیلی بریفنگ دی گئی۔اس موقع پر ڈپٹی کمشنر آصف علی ڈوگر نے کہا کہ لیہ تونسہ پل اپروچ روڈ ایک اہم عوامی منصوبہ ہے، جس کی تکمیل سے شہریوں کو آمدورفت کی بہتر سہولیات میسر آئیں گی جبکہ علاقے میں تجارتی اور معاشی سرگرمیوں کو بھی فروغ ملے گا۔انہوں نے ہدایت کی کہ منصوبے پر تعمیراتی کام کی رفتار مزید تیز کی جائے اور مقررہ معیار کے مطابق بروقت تکمیل یقینی بنائی جائے۔ڈپٹی کمشنر نے مزید کہا کہ منصوبے کے تحت گائیڈ بند کی تعمیر کے لیے متعلقہ ادارے باہمی رابطوں کو مؤثر بنائیں، درپیش مسائل فوری حل کریں اور تعمیراتی کام کی مسلسل نگرانی یقینی بنائیں۔انہوں نے یقین دہانی کرائی کہ ضلعی انتظامیہ عوامی مفاد کے اس اہم منصوبے کی بروقت تکمیل کے لیے نیشنل ہائی وے اتھارٹی کو ہر ممکن تعاون فراہم کرے گی۔
