لیہ (نمائندہ لیہ ٹی وی) تھانہ کروڑ کی حدود میں پرانی دشمنی کی بنا پر فائرنگ کا افسوسناک واقعہ پیش آیا جس کے نتیجے میں ایک شخص جان کی بازی ہار گیا۔ پولیس کے مطابق فائرنگ کا واقعہ کروڑ لعل عیسن کے نواحی علاقے بستی گنجڑ میں پیش آیا جہاں نامعلوم افراد نے اندھا دھند فائرنگ کر دی۔فائرنگ کے نتیجے میں غلام عباس قوم بلوچ موقع پر ہی دم توڑ گیا۔ اطلاع ملتے ہی تھانہ کروڑ پولیس موقع پر پہنچ گئی اور شواہد اکٹھے کرتے ہوئے قانونی کارروائی کا آغاز کر دیا۔ پولیس نے مقتول کی لاش کو ضروری کارروائی کے بعد ٹی ایچ کیو ہسپتال کروڑ منتقل کر دیا ہے۔پولیس کا کہنا ہے کہ واقعہ پرانی دشمنی کا شاخسانہ معلوم ہوتا ہے، جبکہ ملزمان کی گرفتاری کے لیے مختلف پہلوؤں سے تفتیش جاری ہے۔ علاقے میں خوف و ہراس پھیل گیا، تاہم پولیس کی بھاری نفری تعینات کر دی گئی ہے۔
