لیہ(نمائندہ لیہ ٹی وی)وزیر اعلیٰ پنجاب مریم نواز اور انسپکٹر جنرل پولیس پنجاب کی ہدایت پر ریجنل پولیس آفیسر ڈیرہ غازیخان کیپٹن (ر) سجاد حسن خان نے ضلع لیہ کا ایک اہم اور تفصیلی دورہ کیا۔ اس موقع پر انہوں نے مختلف عوامی، تعلیمی اور ادارہ جاتی سرگرمیوں میں بھرپور حصہ لیا اور پولیس و عوام کے مابین تعلقات کو مضبوط بنانے کے لیے متعدد اقدامات کیے۔آر پی او نے اپنے دورہ کے دوران قصبہ جمن شاہ اور سٹی لیہ میں کھلی کچہریوں کا انعقاد کیا، جہاں شہریوں نے اپنے مسائل براہ راست بیان کیے۔ آر پی او نے نہ صرف ان مسائل کو تحمل سے سنا بلکہ موقع پر ہی متعلقہ افسران کو ان کے فوری حل کے احکامات بھی جاری کیے۔
انہوں نے ڈی پی او لیہ محمد علی وسیم کی اوپن ڈور پالیسی اور عوامی فلاح کے لیے ان کی جانب سے کیے جانے والے اقدامات کو سراہا۔آر پی او نے لیہ پولیس کی بہترین کارکردگی کی تعریف کرتے ہوئے کہا کہ قلیل عرصہ میں کروڑوں روپے کے مال مسروقہ کی برآمدگی ایک مثالی کامیابی ہے۔ ان کی آمد پر دفتر پولیس لیہ میں چاق و چوبند پولیس دستے نے انہیں شاندار گارڈ آف آنر پیش کیا۔دورے کے دوران انہوں نے یونیورسٹی آف لیہ کے طلباء سے خطاب کیا اور نوجوان نسل کو قانون کی پاسداری، شعور اور مثبت کردار کی اہمیت سے آگاہ کیا۔ علاوہ ازیں، انہوں نے مقامی سیاسی قیادت، وکلا، انجمن تاجران، اور امن کمیٹی کے ارکان سے علیحدہ علیحدہ ملاقاتیں کیں، جس سے مختلف طبقات کے ساتھ پولیس کے روابط کو مزید وسعت ملی۔آر پی او نے اردل روم کے دوران پولیس ملازمین کے مسائل بھی سنے اور ان کے حل کے لیے احکامات جاری کیے۔ اس موقع پر انہوں نے ترقی پانے والے افسران کو رینک لگائے اور اچھی کارکردگی دکھانے والے اہلکاروں کو تعریفی اسناد اور انعامات سے نوازا۔آخر میں، آر پی او نے ڈی پی او محمد علی وسیم کے ہمراہ دفتر پولیس کے لان میں شجرکاری مہم کے تحت پودا لگا کر ماحولیاتی تحفظ کا پیغام بھی دیا۔ انہوں نے تھانہ سٹی لیہ اور تھانہ صدر لیہ کا دورہ کرکے SIPS نظام کا جائزہ بھی لیا۔