ملتان:(لیہ ٹی وی)ڈپٹی کمشنر محمد علی بخاری نے کہا ہے کہ جعلی و زائد المعیاد ادویات کے کاروبار میں ملوث مافیا کے گرد گھیرا تنگ کردیا گیا ہے انسانی جانوں سے کھیلنے والوں سے آہنی ہاتھوں سے نمٹا جائے گا۔ان خیالات کا اظہار انہوں نے گزشتہ روزڈرگ کوالٹی کنٹرول بورڈ کے اجلاس کی صدارت کرتے ہوئے کیا اس موقع پر ڈپٹی کمشنر محمد علی بخاری نے متعدد میڈیکل سٹورز اور کمپنیوں کو ڈرگ ایکٹ کی خلاف سزائیں بھی سنائیں ۔قبل ازیں ڈپٹی کمشنر نے بغیر گارنٹی ادویات فروخت کرنے والوں کے کیسز ڈرگ کورٹ بھجوادیئے۔ڈپٹی کمشنر نے ہدایت کی کہ ڈرگ انسپکٹرز تمام میڈیکل سٹورز اور ادویات ساز کمپنیوں کی انسپکشن کریں جبکہ ریکارڈ مرتب نہ کرنے والوں کے خلاف سخت ایکشن ہوگا محمد علی بخاری نے کہا کہ ضلعی انتظامیہ کی جانب سے ڈرگ سٹورز کی چیکنگ کی خصوصی ٹیمیں بھی تشکیل دے دی گئی ہے۔
