لاہور (لیہ ٹی وی) وزیرِاعظم شہباز شریف اعلیٰ سطحی وفد کے ہمراہ لاہور سے متحدہ عرب امارات روانہ ہو گئے۔ وہ دبئی میں منعقدہ ورلڈ گورنمنٹس سمٹ میں شرکت کریں گے، جہاں عالمی رہنماؤں اور سرمایہ کاروں سے اہم ملاقاتیں متوقع ہیں۔ وزیرِاعظم کو دورے کی دعوت دبئی کے فرمانروا شیخ محمد بن راشد آل مکتوم نے دی ہے۔ شہباز شریف 10 اور 11 فروری تک یو اے ای میں قیام کریں گے اور ورلڈ گورنمنٹس سمٹ میں خطاب بھی کریں گے، جس میں پاکستان کی اقتصادی صورتحال، سرمایہ کاری کے مواقع اور ترقیاتی منصوبوں پر روشنی ڈالیں گے۔ دورے کے دوران وزیرِاعظم یو اے ای کی قیادت سے اہم ملاقاتیں کریں گے، جبکہ دیگر ممالک کے سربراہان سے بھی تبادلہ خیال کریں گے۔ اس کے علاوہ یو اے ای میں مقیم پاکستانی کمیونٹی، کاروباری برادری اور سرمایہ کاروں سے بھی ملاقات کا شیڈول طے ہے۔ وزیرِاعظم کے ہمراہ وفاقی وزراء اسحاق ڈار، خواجہ آصف، احد چیمہ، محمد اورنگزیب اور سردار اویس لغاری شامل ہیں، جبکہ وزیرِاطلاعات عطاء اللّٰہ تارڑاور معاونِ خصوصی طارق فاطمی بھی وفد کا حصہ ہیں۔ وزیرِاعظم شہباز شریف نے روانگی سے قبل کہا کہ "پاکستان اپنی معیشت کی بحالی کی راہ پر گامزن ہے، اور دنیا کے ساتھ اقتصادی تعلقات کو مزید مضبوط بنایا جائے گا۔
