اسلام آباد (لیہ ٹی وی) پاکستان تحریک انصاف (پی ٹی آئی) کے رہنماؤں بیرسٹر گوہر علی خان اور بیرسٹر علی ظفر نے جوڈیشل کمیشن کے اجلاس کا بائیکاٹ کر دیا۔ سپریم کورٹ کے باہر میڈیا سے گفتگو میں بیرسٹر گوہر نے بتایا کہ جوڈیشل کمیشن کے اجلاس میں 8 ججز کے ناموں پر غور ہونا تھا، تاہم پی ٹی آئی نے 26ویں آئینی ترمیم کے خلاف درخواستیں دائر کر رکھی ہیں جو ابھی تک التواء کا شکار ہیں۔ انہوں نے کہا کہ جب تک 26ویں آئینی ترمیم کا فیصلہ نہیں ہو جاتا، جوڈیشل کمیشن کا اجلاس ملتوی کیا جانا چاہیے تھا۔ بیرسٹر گوہر کے مطابق جسٹس منصور علی شاہ اور جسٹس منیب اختر نے بھی جوڈیشل کمیشن اجلاس مؤخر کرنے کا مطالبہ کیا تھا، لیکن ایسا نہ ہونے پر دونوں ججز نے اجلاس کا بائیکاٹ کر دیا۔ بیرسٹر علی ظفر نے بھی بائیکاٹ کی تصدیق کرتے ہوئے کہا کہ جب تک ججز کی سینیارٹی کا مسئلہ حل نہیں ہوتا، جوڈیشل کمیشن کی کارروائی کو مؤخر کیا جانا چاہیے تھا، مگر ہمارے مؤقف کو اہمیت نہیں دی گئی۔ ذرائع کے مطابق چیف جسٹس پاکستان یحییٰ آفریدی کی زیرِ صدارت جوڈیشل کمیشن کا اجلاس جاری ہے، جسے روکنے کے مطالبے پر جسٹس منصور علی شاہ اور جسٹس منیب اختر نے بائیکاٹ کر دیا۔
