دہشت گردی کے خلاف جنگ میں قوم متحد، سیکیورٹی فورسز کی قربانیوں کو سلام: وزیرِ اعظم شہباز شریف

کوئٹہ(لیہ ٹی وی)وزیرِ اعظم شہباز شریف نے کہا ہے کہ آج ہمیں اپنی صفوں میں اتحاد کی جتنی ضرورت ہے، پہلے کبھی نہیں تھی۔ بلوچستان میں امن و امان سے متعلق اجلاس کے دوران گفتگو کرتے ہوئے انہوں نے قلات میں ہونے والے المناک واقعے پر افسوس کا اظہار کیا اور سی ایم ایچ میں زخمیوں کی عیادت کے بعد ان کے حوصلے کی داد دی۔
وزیرِ اعظم کا کہنا تھا کہ دہشت گردی کے خلاف جنگ میں سیکیورٹی فورسز نے جانوں کا نذرانہ پیش کیا ہے اور پوری قوم ان قربانیوں کو سلام پیش کرتی ہے۔ انہوں نے زخمی جوانوں کی ہمت کو سراہتے ہوئے کہا کہ وہ بے خوف ہیں اور اگر جان کا نذرانہ دینا پڑے تو اس پر بھی کوئی ملال نہیں رکھتے۔
شہباز شریف نے مزید کہا کہ یہ سیاست کا وقت نہیں بلکہ دہشت گردی کے خلاف اپنی توانائیاں یکجا کرنے کا لمحہ ہے۔ ماضی کی غلطیوں کے ازالے کے لیے ہمارے بہادر سپوت اپنی جانوں کا نذرانہ پیش کر رہے ہیں، میں ان کے خاندانوں اور ماؤں کو سلام پیش کرتا ہوں۔