ملتان(لیہ ٹی وی)صوبائی وزیر صحت پنجاب خواجہ سلمان رفیق سے ایڈیشنل چیف سیکرٹری فواد ہاشم ربانی نے آج سرکٹ ہاوس میں ملاقات کی۔ملاقات میں ایل پی جی کنٹینر کے افسوسناک واقعے بارے گفتگو کی گئی۔وزیر صحت خواجہ سلمان رفیق نے گفتگو میں کہا کہ وہ وزیر اعلیٰ مریم نواز شریف کی خصوصی ہدایت پر ملتان پہنچے ہیں۔انہوں نے برن یونٹ میں داخل زخمیوں کی عیادت کی ہے اور ہسپتال انتظامیہ کو زخمیوں کے بہترین علاج معالجہ کی ہدایات جاری کی ہیں۔ انہوں نے بتایا کہ وہ اس المناک واقعے بارے وزیر اعلیٰ پنجاب کو مکمل بریفنگ دیں گے۔ انہوں کہا کہ کوٹ چھٹہ میں بھی ایل پی جی ٹینکر کو آگ لگنے کا واقعہ رونما ہوا ہے،اس طرح کے حادثات کو روکنے کے لئے سخت اقدامات کی ضرورت ہے۔ایڈیشنل چیف سیکرٹری فواد ہاشم ربانی نے ملتان اور کوٹ چھٹہ گیس کنٹینر دھماکہ بارے صوبائی وزیر کو بریفنگ دی اور بتایا کہ اس اندوہناک واقعہ کی وجہ سے پورے ملتان کی فضا سوگوار ہے۔انہوں نے تجویز دی کہ ایل پی جی کنٹینرز کی کوالٹی چیک کرنے کے لئے جامع پالیسی کی ضرورت ہے۔فواد ہاشم ربانی نے بتایا کہ جنوبی پنجاب میں آئل اور گیس کے غیر قانونی سٹوریج کے خلاف سخت کریک ڈاون شروع کیا جارہا ہے۔ انہوں نے بتایا کہ قانون کے تحت پہلے سے قائم آئل اور گیس ایجنسیوں کے آڈٹ اور انہیں این او سی جاری کرنے کے حوالے سے نئے ٹی او آرز کی ضرورت ہے۔
