عبداللّٰہ شفیق ون ڈے کرکٹ میں بدترین ریکارڈ کے حامل بن گئے
ون ڈے سیریز کے تمام میچز میں صفر پر آؤٹ ہونے والے پہلے پاکستانی اوپنر، ایک سال میں سب سے زیادہ صفر بھی حاصل کیے
پاکستانی اوپنر عبداللّٰہ شفیق کے نام ون ڈے کرکٹ کا ایک بدترین ریکارڈ درج ہو گیا۔ جنوبی افریقہ کے خلاف حالیہ ون ڈے سیریز کے تینوں میچز میں وہ بغیر کوئی رن بنائے آؤٹ ہوئے، جس کے بعد وہ ایک ون ڈے سیریز کے تمام میچز میں صفر پر آؤٹ ہونے والے پہلے پاکستانی اوپنر بن گئے ہیں۔
عبداللّٰہ شفیق نے 2024 میں انٹرنیشنل کرکٹ میں 7 مرتبہ صفر پر آؤٹ ہو کر ایک اور ناپسندیدہ ریکارڈ بھی اپنے نام کر لیا۔ وہ ایک سال میں سب سے زیادہ انٹرنیشنل "ڈکس” حاصل کرنے والے پاکستانی اوپنر بن گئے ہیں۔
اس سے قبل یہ ریکارڈ عمران نذیر اور محمد حفیظ کے پاس تھا، جنہوں نے بالترتیب 2000 اور 2012 میں 6 مرتبہ صفر پر آؤٹ ہو کر یہ ناپسندیدہ اعزاز حاصل کیا تھا۔
کرکٹ کے ماہرین نے عبداللّٰہ شفیق کی حالیہ کارکردگی پر تشویش کا اظہار کیا ہے اور انہیں تکنیکی خامیوں پر کام کرنے کا مشورہ دیا ہے۔ پاکستانی شائقین امید رکھتے ہیں کہ وہ جلد اپنی فارم بحال کرکے ٹیم کے لیے اہم کردار ادا کریں گے۔