لیہ:ڈی پی او لیہ حسن جاوید بھٹی نے کہا ہے کہ ٹریفک قوانین پر عمل کرنا ہر شہری کی ذمہ داری ہے، ٹریفک قوانین کی خلاف ورزی نہ صرف اپنی بلکہ دوسروں کی زندگیوں کو بھی خطرے میں ڈال سکتی ہے۔ ان خیالات کا اظہار انہوں نے کیپس کالج لیہ میں منعقدہ ٹریفک آگاہی سیمینار سے خطاب کرتے ہوئے کیا۔ سیمینار میں کالج پرنسپل، اساتذہ، طلباء، ڈی ایس پی ٹریفک اور دیگر پولیس افسران نے شرکت کی۔ ڈی پی او حسن جاوید بھٹی نے طلباء کو ٹریفک قوانین کی اہمیت اور ان پر عملدرآمد کے حوالے سے آگاہ کرتے ہوئے کہا کہ موٹر سائیکل چلاتے وقت ہیلمٹ کا استعمال، گاڑی چلاتے ہوئے سیٹ بیلٹ باندھنا، تیز رفتاری سے اجتناب اور دوران ڈرائیونگ موبائل فون کا استعمال نہ کرنا محفوظ سفر کے لیے انتہائی ضروری ہے۔ انہوں نے طلباء پر زور دیا کہ وہ خود بھی ٹریفک قوانین کی پابندی کریں اور اپنے اہل خانہ سمیت دیگر شہریوں کو بھی ان قوانین پر عمل کرنے کی ترغیب دیں۔ ڈی پی او نے مزید کہا کہ ٹریفک قوانین سے متعلق شعور و آگاہی پیدا کرکے ٹریفک حادثات میں نمایاں کمی لائی جا سکتی ہے۔
