ڈسٹرکٹ ہیڈ کوارٹر ہسپتال میں ایڈز کے عالمی دن کے سلسلہ میں سیمینار کا انعقاد کیا گیا

لیہ(نمائندہ لیہ ٹی وی )ڈسٹرکٹ ہیڈ کوارٹر ہسپتال میں ایڈز کے عالمی دن کے سلسلہ میں سیمینار کا انعقاد کیا گیا۔ سیمینار میں ایڈیشنل ڈپٹی کمشنر جنرل شبیر احمد ڈوگر ، چیف ایگزیکٹو آفیسر ہیلتھ ڈاکٹر شاہد ریاض، ایم ایس ڈاکٹر غلام محی الدین، انچارج ایڈز سنٹر ڈاکٹر فرخ، سینئر ڈاکٹرز، سائیکالوجسٹ خرم شیراز، پیرا میڈیکل سٹاف، ٹرانس جینڈر نمائندہ اور میڈیا نمائندگان نے شرکت کی۔ سی ای او ہیلتھ ڈاکٹر شاہد ریاض نے سیمینار سے خطاب کرتے ہوئے کہا کہ بروقت تشخیص اور مناسب علاج سے ایڈز جیسے موذی مرض کا مقابلہ کیا جا سکتا ہے۔ انہوں نے کہا کہ پنجاب ایڈز کنٹرول پروگرام کے تحت ڈی ایچ کیو میں ٹیسٹ اور ادویات کی مفت سہولت موجود ہے۔ انچارج ایڈز کنٹرول سینٹر ڈاکٹر فرخ نے کہا کہ عوام کو مفت معیاری ٹیسٹ اور ادویات کی سہولت 24/7 فراہم کی جا رہی ہیں اور فوڈ سپلیمنٹس بھی دستیاب ہیں۔ عوام سکریننگ کے لئے ایڈز کنٹرول سینٹر رجوع کر سکتے ہیں۔ ایم ایس ڈی ایچ کیو ہسپتال ڈاکٹر غلام محی الدین نے گفتگو کرتے ہوئے کہا کہ احتیاطی تدابیر اختیار کر کے بہت سے امراض سے بچا جا سکتا ہے۔ انہوں نے کہا کہ ادویات کے باقاعدہ استعمال سے ایڈز کو پھیلنے سے روکا اور کنٹرول کیا جا سکتا ہے۔ سائیکالوجسٹ خرم شیراز نے کہا کہ نوزائدہ بچوں کو ایڈز سے محفوظ رکھنے کے لئے بھی اقدامات اٹھائے جا رہے ہیں۔ بعد ازاں ایڈیشنل ڈپٹی کمشنر جنرل شبیر احمد ڈوگر کی سربراہی میں ڈی ایچ کیو میں ایڈز بارے آگہی واک بھی کی گئی۔